小娟今日好開心，一放學返屋企，就抱住娟媽起勢咁鍚，娟媽問佢發生咗乜嘢事？但小娟就打死都唔肯講，只係蓮子蓉咁嘅樣，就走番入房裏面。小娟唔講，令娟媽更加擔心，於是翌日星期日邊度都唔去，小娟一出門口，佢就尾隨跟蹤。
由於娟媽年中總會玩幾次跟蹤，所以佢啲跟蹤術，足可媲美狗仔隊，小娟一啲都冇發覺到。就喺街口，發現小娟跟個金毛青年有講有笑，態度仲十分熟落，似乎感情非輕，跟手兩人就走咗入去一幢大廈裏面，似乎要上樓咁樣，娟媽當然死都跟住。
小娟同個金毛青年入咗一個單位，同一時間娟媽從後樓梯閃出，貼耳聽住單位內嘅動靜，終於畀佢聽見小娟話：「老師你想點，只要開聲，我一定滿足你嘅要求。」男聲：「我一係唔要，一要就成個月，到時你每日都要嚟我度幾個鐘，你得咩？」
小娟：「為咗老師你，我犧牲又有乜所謂？」男聲：「有時仲唔止一個男人，冇問題嗎？」小娟：「冇問題！」男聲：「咁你可以開始味？」小娟：「嚟啦！」男聲：「好！先擺個Pose，屁股向天，趴喺梳化上面……」呢個時候大門被踼開。
各位聰明嘅讀者，大家又估唔估到小娟喺呢個老師屋企搞乜嘢呢？
1. 做老師嘅臨時鐘點工
2. 做老師嘅新進搖錢樹
3. 做老師嘅寫生模特兒
4. 做老師嘅裸體性玩偶
答案：3. 做老師嘅寫生模特兒
解釋：小娟開心因為有人搵佢做模特兒，原來有個繪畫老師，請小娟做寫生模特兒，因為佢日日都有班，所以要模特兒日日都嚟，每次都要花幾個鐘頭，如果冇學生就做老師嘅私人模特兒，所以有時應付一個人，有時應付成班人，至於金毛青年就係老師嘅學生，只希望娟媽出手咪咁重，打傷老師就唔好啦！
小德