性感派對宣傳泳衣
呢間咁有計嘅泳衣公司，係加州一間好細規模嘅比堅尼生產商，由於新一季嘅設計出爐，銷售單位想做啲宣傳，但公司嘅宣傳費認真有限，於是一眾銷售人員馬上開會研究，發現有一個方法最便宜又最有效果，就係開一個比堅尼之夜嘅少女派對。負責人丹尼向我哋解釋，佢話：「我哋設計嘅比堅尼，銷售對象係妙齡嘅少女，而要聚集佢哋，向佢哋宣傳新產品，最好就係用『玩』，有同事諗到利用派對嚟吸引佢哋，於是我哋決定用有限嘅預算，搞一個盛大嘅比堅尼派對。」
但要搞得成功，似乎單用派對一招唔夠力喎？丹尼話：「我哋決定咗大方向之後，諗細節時，都覺得要吸引佢哋參加同時宣傳埋新產品，似乎有啲難度，諗咗好多計都唔可行，喺最頭痛嘅時候，某女同事嘅名牌包包突然畀人整污糟咗。」
為包參選性感舞后
丹尼繼續：「個女同事平時斯斯文文，但當佢個包包污糟咗之後，佢竟然發晒癲，我當時都嚇一跳，呢個時候畀我發現，原來女士們對佢哋嘅名牌包包，有時比自己條命更緊要，有好多未有錢買，更係發夢都想擁有，於是畀我諗到條橋。」
丹尼條橋就係喺比堅尼派對裏面，搞一個「性感舞后」選舉，所有參賽嘅囡囡都要着佢哋公司設計嘅泳衣跳舞，即係免費做埋佢哋嘅模特兒，而獎品就係一個少女們夢寐以求嘅限量版名牌包包，丹尼一提出，全公司女同事都話要參加比賽。可想而知，到派對正式出街嘅時候，反應有幾墟冚。最後由於反應太好，原本一晚嘅派對，決定開多兩場連搞三晚，單係派對都令到佢哋公司唔使出錢仲有錢賺，真係唔到你唔服丹尼嘅諗頭，不過丹尼話：「最服都係班愛包包如命嘅囡囡。」
全晚洗腦夠晒高招
至於初賽當日嘅情況，未天黑已經喺門口排晒隊，由於參賽嘅人數實在太多，於是報名費由原本三十蚊加至一百蚊一位，仲要每個入圍嘅包飛十張，美其名搵啲朋友嚟打氣，實際連門票都要佢哋幫手賣埋，難怪呢個派對一場變三場啦。正式開騷當晚，先嚟個普通跳舞飲酒時段，當大家熱晒身，就輪到比賽開始，每晚五十幾個囡囡參加複賽，先畀半個鐘時間佢哋自由發揮，然後由評判選出十大「舞后」進入決賽，之後每人再畀三分鐘時間佢哋施展渾身解數，從中再選出冠軍舞后誰屬。
為咗增加大家嘅投入感，到決賽時，係以全場嘅掌聲嚟選出冠軍，所以台上台下都玩得十分投入，但記住一點，全部參賽囡囡都係着住丹尼設計嘅比堅尼，觀眾先入為主，嚟緊買泳衣，一定會買番呢個款嘅，只要銷售點配合到，丹尼想唔發都難。
撰文：小德