肥強最近爆料，呢單堅料真係要同大家講講，肥強話：「大家去內地嘅休閒中心玩，間間場都明碼實價，一百就一百，二百就二百，好少人再會畀小費，就算埋單時有零錢，一般客人會斗零都攞晒，唔會喺嗰盆入面留番一個幾毫。」
本來一直都冇乜嘢！但之前發生大地震，之後萬眾一心，人人有錢捐錢，有力出力，而唔少休閒中心，亦加入籌款嘅行列，期間除咗各工種人員嘅特別捐款之外，最多場用嘅一招，就係叫客人將埋單後剩低嘅零錢捐晒去賑災。
肥強話：「咪睇少每人嗰兩三蚊，加加埋埋，一日有得兩三百個客幫親，條數都有成千幾銀，一日千幾，一個月幾萬，令唔少老闆經理眼都紅晒，但當時全國響應賑災，冇乜人敢動啲捐款，最後順利送晒去災區，幫助有需要嘅災民。」
但最近巿道唔好，啲老闆經理，又想重施故技，巧立名目，向客人嘅捐款打主意，但地震賑災，好似已經冇咁有新鮮感，好難再引發起客人嘅同情心。肥強話：「佢哋諗嚟諗去，都諗唔到好計，後來有人去超巿買嘢，畀佢哋諗到辦法。」
肥強話：「最近好多超巿唔畀膠袋啲顧客，但如果要嘅話，就要佢哋捐五毫子畀某某中心。當中好多中心機構，都係聞所未聞，啲老闆經理於是照學超巿，喺收銀處整個透明膠箱，話係某某中心機構，當你出嚟埋單嘅時候就會見到。」
肥強繼續：「收銀找零錢畀你嘅時候，就會同你講，我哋同某某中心合作搞個乜嘢慈善活動，希望各位顧客支持，只要將零錢捐出，就可以令好多人受惠，諸如此類。客人見你有個籌款箱，一般都唔會諗，幾蚊嘅零錢，都會全數倒晒落去。」
有冇客人攞走晒啲零錢呢？肥強話：「好多客人就算攞都唔會攞晒，因為你話咗做慈善，佢哋最少都入番一兩蚊落去，而且呢啲場亦會好蠱惑，會將價錢調整，足浴$20改為$22，桑拿$338就改為$342，等你找番大量零錢，放一半落去都好和味。」
但唔會有人監管嘅咩？肥強話：「邊有人監管吖？有好多場用人哋真正嘅機構嚟掩飾，但更多嘅係作間假嘅出嚟，總知收銀同部長扯貓尾，就一定氹到客人捐幾蚊，所以喺度呼籲大家，如果發現呢啲箱喺休閒場，千祈咪上當呀？」
小德