知己知彼
好多女士都會作出各種措施，以防身邊嘅男人同狐狸精扯上關係，但係好多時都係防不勝防。對於呢個現象，靚女KK笑道：「冇辦法啦！男人之所以被狐狸精所迷惑，除咗因為狐狸精都係樣靚身材正嘅美人外，更因為佢哋深知男人嘅性格，針對弱點埋手，自然能夠成功埋到佢哋身，仲可以得到男人嘅真情添！」
坐喺對面嘅靚女婷婷聞言，便點頭道：「由於狐狸精對男人心思摸得一清二楚，對男人嚟講，尤其係嗰啲結咗婚嘅男士而言，實在有種難以言喻嘅吸引力，想唔出軌都難。」聽婷婷咁講，好似以前曾經受過狐狸精嘅傷害喎。婷婷嘆咗口氣道：「我個前男友就係畀啲狐狸精勾走嘅，而經過呢件事後，我發現如果想留得住男人個心，就要自己化身狐狸精，以後就唔怕條佬會畀其他狐狸精勾走啦！」
媚惑眾生
常言道：「知己知彼，百戰不殆」，唔想畀狐狸精勾走條佬嘅話，只要深知狐狸精嘅做法，將來自然有所防備。KK笑道：「冇錯！我哋身邊唔少姊妹，都屬於狐狸精一族，故此平日只要留意佢哋溝仔嘅手法，同佢哋多啲交流，便能對狐狸精嘅諗法同處事手法有深入嘅認識。」
既然兩位靚女身邊不乏狐狸精，唔知經過一番鑽研後，發現狐狸精最具殺傷力嘅溝仔手法係乜呢？KK笑道：「以我個人睇法，相信就係狐狸精嘅媚功！所謂媚功，其實係從骨子裏透出來的一種魅力，可以直接刺激男人嘅性意識，令佢產生一種莫名嘅興奮。而媚功最大嘅體驗，就係溫柔。對男人嚟講，溫柔可以話係一種強而有力嘅武器。不論男性開心或煩惱嘅時候，只要狐狸精使出一招『無比溫柔』嘅話，男人都會情不自禁被臣服。呢個時候， 狐狸精再使出電眼攻勢嘅話，不管幾咁剛硬嘅男人，都會馬上被狐狸精所融化，到時問佢屋企喺邊都唔知！」
妖冶舉止
雖然KK講法不無道理，但婷婷卻認為狐狸精最厲害嘅手段並非媚功。婷婷笑道：「狐狸精作為妖精嘅一種，最厲害嘅手段莫過於佢嘅妖氣！」聽到婷婷咁講，忍唔住懷疑婷婷係咪平日睇得太多電視劇，否則點會連妖氣都搬出嚟講？婷婷就話：「你聽埋我講先啦！我所指嘅妖氣，唔係真係嗰種妖精之氣，而係狐狸精嗰種女人天生特有或經後天裝飾出來，嗰種蠱惑男人嘅輕靈、柔軟、迷離嘅氣質同狀態。」
睇見小記唔多明白嘅反應，婷婷笑笑道：「睇你都唔明㗎喇，等我舉個例子啦！狐狸精最為迷人之處，首先反映喺佢哋外在條件上，前凸後趷嘅身材，固然唔少得。此外，妖氣亦可以反映喺一啲性感嘅言行舉止上，例如輕輕地勾搭男人嘅手臂，或有意無意間請佢哋食波餅咁，都能勾起男士們嘅原始本能。我相信，只要學足狐狸精嘅手段嚟冧仔嘅話，以後就唔怕狐狸精會勾走我哋條佬！」不過唔知佢哋會否擔心，被其他女人視佢哋做狐狸精呢？
撰文：阿豪