失戀停筆
呢兩位諗住寫日記發達嘅囡囡，分別係今年27歲嘅Monica Scott，同埋只得22歲嘅Mrata，佢哋兩個都係由外地移居美國嚟嘅新移民，所以一有機會就必定搏到盡，加上人靚身材正，所以出道短短日子，就已經順利上位。
做咗阿姐工作應該排到滿滿，竟然仲有時間嚟寫日記，真係服咗佢哋份毅力同恒心，Monica Scott笑笑口話：「寫日記係我童年開始嘅習慣，一直寫咗十幾廿年，家陣想改都改唔到。」
一開始點解會寫日記呢？Monica話：「當時讀緊小學，有個好靚仔嘅老師教我哋語文科，佢鼓勵我哋寫日記，仲要我哋將每個星期嘅日記交畀佢睇，因為個老師實在太靚仔，所以我好畀心機咁去寫好我嘅日記。」
Monica繼續：「我記得有一次老師讚我嘅日記寫得好，仲喺班上面朗讀出嚟，當佢朗讀完，成班同學拍晒手掌，我不知幾開心。自此就算老師唔再睇我哋嘅日記，我都日日寫落去！直至高中時第一次失戀，我至冇再寫落去。」
愛情帳簿
傷心嘅嘢有乜好寫吖！咁幾時開始再度執筆呢？Monica話：「我一個人嚟咗美國之後，就開始寫番日記，特別係入咗行後，接觸嘅嘢多咗，所以內容都豐富咗，每日可以寫上幾百字甚至過千字。」咁出書都得啦！
Monica一笑話：「我就係有咁嘅打算，我打算退休之後，就將我喺脫星界嘅日子，寫成自傳推出，相信一定大賣，如果反應好，仲會將我喺上流社會嘅所見所聞，再出一本有關佢哋秘聞嘅書。」聽落都吸引，難怪話寫日記都會發達，原來係咁。
至於另一位年紀較細，出道日子較短嘅Mrata，佢又點解咁鍾意寫日記呢？Mrata話：「我一直都好多人追，中學嘅時候，同時間要應付六七個男仔，對住唔同人就要講唔同嘅嘢，但怕講完又唔記得，於是開始用日記嚟記低。每日拍完拖第一件事，就係將我同呢個男仔講過乜嘢記低，如是者每日咁做紀錄，當要去拍拖之前，就翻查一下日記，睇睇同呢個男仔講過乜，咁就包冇撞板。」咁嘅絕橋都畀你諗到，真係服咗你，咁期間有冇學Monica咁，曾經停寫過自己嘅日記呢？
轉寫網誌
Mrata話：「出嚟做嘢之後冇乜男仔追我，我就停寫咗一排，之後有機會嚟美國，嚟到之後就忙住搵工做，前後停咗兩三年左右，後來入咗行，經理人公司同我做咗個網站，反應都算唔錯，每日有上千人瀏覽。」
咁咪好發！Mrata話：「發就唔算，但為咗keep住班fans，於是喺個網站入面加埋自己個blog落去，每日寫啲生活小插曲，其實咪同寫日記差唔多，只不過日記只係自己一個人睇，而blog就係畀所有人睇嘅。」咁寫嘅時候最大嘅分別係乜嘢呢？
Mrata話：「最大嘅分別可能係鬧人嘅時候，要特別小心啲，一定要有真憑實據至好鬧，好似有一次我喺我嘅blog裏面鬧一間餐廳嘅服務員好差，一出街冇耐就收到餐廳嘅律師信告我誹謗，好彩我有證有據咁先至冇事，所以鬧人時一定要小心啲。」
家陣Mrata寫blog當寫日記，但點樣可以發達呢？Mrata話：「自從我寫埋blog之後，瀏覽人數竟然大增，家陣訂閱我嘅blog嘅有成萬人，你話呢班fans人人都買我嘅寫真同影碟，我真係想唔發都幾難。」原來寫日記真係咁掂，睇嚟大家都要寫吓啦。
Monica Scott Profile
年齡：27歲
身高：5呎3吋
三圍：35、24、35
興趣：出自傳
Mrata Profile
年齡：22歲
身高：5呎3吋
三圍：35、25、35
興趣：寫網誌
小德