威臣用成副身家買咗部二手跑車，於是佢揸住架車進行獵艷。可惜揸咗成個星期，不單止美女搵唔到，連搵個阿婆坐吓嘅機會都冇，於是決定退番部車畀車行。按照合約規定，賣出架車七日之內，如果客人唔滿意，可以原銀退回車行，於是威臣就同其他職員提出要求，職員當然拖得就拖，就喺呢個時候，有個成熟嘅性感女郎出現。
美女身穿貼身迷你裙，上身一件薄過紗嘅裇衫，由於美女領口啲衫鈕全部冇扣，睇到佢嘅北半球，不停晃動，好似不甘被胸圍約束而強力反抗呼之欲出。
出人意表嘅係美女竟然睇中咗威臣架車：「呢架車賣唔賣㗎！」威臣期待已久嘅機會終於出現，於是大叫：「架車係我嘅！」美女一扁嘴：「咁即係唔賣啦！係呢！架車勁唔勁㗎？」
威臣：「勁唔勁，講好難表達嘅，不如試吓喇？」於是性感美女上咗威臣架車，齊齊去試車，美女喺車上突然話好想去海灘，威臣心諗今次冇死喇！由巿區去海灘雖然要四個鐘，但去到剛好十一、二點，加上海灘出名係偷情勝地，今次發達啦！
去到海灘，剛好十一點，威臣中途喺油站買咗紅酒同食物，於是同美女先開餐，期間左右兩邊嘅車裏面，都傳出女士嘅呻吟聲，威臣反而有啲尷尬，但美女就同威臣一面講車，一面食嘢，於是一直傾到十二點左右，威臣心諗係時候行動啦！
於是同美女講：「其實除咗架車馬力勁，我都好勁㗎，唔信一樣可以試吓喎！」美女話：「唔使喇！其實架車有幾勁，我一早知道，至於你有幾勁，我就冇興趣知道！」於是轉身落車，威臣一怔，連忙追落車：「你走！你走咗就冇車返巿區！」
點知話未講完，有架房車出現，美女跳上房車，得意地向佢揮手，威臣大受打擊，於是翌日再去車行退貨，但職員話七日限期已過，公司唔會退款，威臣發難渣，但最後畀職員趕走，而呢個時候美女再出現，職員話：「經理，今次全靠你咋！」美女話：「呢啲後生仔！以為揸架跑車就可以溝到女，唔畀啲教訓佢哋都唔得呀！」
小德