李恆匯拍住堅Sir邊教邊學

當日以球員身份加盟橫濱FC香港，與「堅Sir」結緣，亦正是「堅Sir」一席話，成為「阿匯」足球生涯的轉捩點：「其實我都諗咗好耐，自己太想踢波，如果當時唔做助教，去其他球會都會有得踢，奈何自己隻腳有問題，所以當『堅Sir』問我轉唔轉做助教嗰陣，我覺得可以試吓，咁就一直做到依家。」

嚴師出高徒激讚馮慶燁

與「堅家軍」合作近6年，「阿匯」坦言難忘事多不勝數：「記得教YFC澳滌嗰季，班球員好後生，雖然攞唔到冠軍，但見證住『堅Sir』攞最佳教練。今時今日呢班球員已經好成熟，每年都進步緊。其實我對青年軍好嚴，識我嘅人就覺得我個人好輕鬆，但其實我教波都好嚴，一開始我就成日罰黃威做掌上壓，到佢哋表現愈嚟愈成熟，我亦冇咁嚴厲。」今季球隊中堅馮慶燁表現穩定，球員時代同樣司職後衞的「阿匯」指大家一直有互相交流，並認為：「去到依家，最弗嘅佢已經超越咗我。」

退役後一直擔任「堅Sir」左右手，「阿匯」在過程中獲益匪淺：「足球嘅內容大同小異，但係足球以外、做人處事各方面，係我跟『堅Sir』學得最多嘅嘢。職業隊除咗練波外，有時球員情緒、私事及需求等都要跟進，既要同老闆溝通，又要跟球迷互動，呢一切都要慢慢學。」他還透露：「雖然我唔係住大埔，但係同『阿興』（助教呂志興）、『阿智』（助教陳旭智）喺15歲嗰陣踢流浪、青年代表隊時都合作過，同佢哋好熟。我哋有咩都唔怕直接講，溝通都易啲。」

到訪神秘國度 好似回到過去

和富大埔目前正身處北韓，準備亞協盃分組賽作客4.25 SC的賽事。李恆匯因足球緣故曾到訪多個亞洲國家及地區，但原來之前亞協盃附加賽對黎明SC，才是「阿匯」首次到訪這個神秘國度：「感覺比較舊式啲，我同『阿智』搭旅遊巴出去練波，嗰日練夜晚，架巴士舊到有個燈膽吊吓吊吓嗰種，影都影唔切相，感覺好新鮮！」與其他球員一樣，「阿匯」坦言最難適應的是：「唯一係上網唔方便啦，但係我初初做球員時都未用智能電話，好似回到過去咁樣！」

李恆匯

出生日期：1985年2月15日

職位：助理教練

曾執教球隊：YFC澳滌、香港飛馬

圖／文：陳焌鏗