謝朗軒22串連3種情
2月14日——有伴侶的忙着籌備如何令另一半過個難忘的節日，沒有伴侶的忙着躲避接二連三的「閃光彈攻擊」，情人節真是個讓人又愛又恨的節日。正為情人節而惆悵的你，看畢這篇關於東方龍獅後衞謝朗軒的專訪，可能令你有所啟發。
一年365日，情侶之間總有着不同的紀念日，但總有一兩個大日子，深深烙印在心中：「揀22號一來係Lucky number，上季喺理文轉着22號之後，表現係進步咗好多。二來22號其實係女朋友同爸爸嘅生日，呢個號碼除代表有女朋友嘅支持之外，亦都想踢波畀爸爸睇，因為佢細個都好鍾意踢波，但係以前職業足球嘅發展唔係咁好，佢隻字不提，唔會鼓勵我去踢波。但係爸爸知道我踢職業之後，我係感受到佢好支持我，即使我返學，佢冇乜叫我畀心機讀書，反而我每場比賽佢都會出席。」「謝朗」細說着。
爸爸背後默默支持
有時候，我們為了討好伴侶，會把家人拋諸腦後。訪問當日，「謝朗」提得最多，不是女朋友便是爸爸：「爸爸之前幾季嚟睇，我都有得踢，今季出場機會少咗，佢每次比賽之前都會問我：『嚟緊呢場有冇得出呀？』。我每次都係答佢：『唔知』。我好想爭取更多機會踢波畀佢睇，就算好多時佢知我冇出場機會，都會入場支持。之前作客廣州都未知我有冇份踢，但係爸爸都上廣州捧場。」聞說女生們都喜歡男生孝順、顧家，難怪「謝朗」早就「封盤」！
計劃同女友遊土耳其
選擇伴侶，有的人追求外貌、有的人追求性格、有的人追求功能，但他們都忽略了一件最重要的事——同步。「嚟緊呀？都可以透露吓嘅，我同女朋友已經計劃咗，應該會去土耳其旅行。我哋主要都係去啲風景靚嘅地方為主，大家性格好似，揀旅行地點嘅時候會覺得東南亞嘅地方都係食嘢同買嘢，反而我哋覺得呢啲嘢香港大部分都買到，所以就想去睇吓及感受世界嘅另一面。」「謝朗」笑說。
圖／文：陳焌鏗