送狗迎豬好波雙喜臨門

東方龍獅鬥佳聯元朗

東方龍獅近期走勢一般，自上月初擊敗凱景後，只錄得2和1負戰績，上仗足總盃首圈不敵夢想FC，主教練陳婉婷坦承：「上仗上半場我哋表現水準以下，下半場力挽狂瀾但已經唔夠時間追，球員信心、士氣點都有影響。」回到菁英盃戰線，「牛丸」期望藉比賽備戰：「我哋嚟緊要踢兩場菁英盃，喺呢兩個禮拜會針對去改善一啲問題，亦希望透過菁英盃保持狀態，但係目標都係菁英盃之後嘅聯賽。」中場茹子楠落實加盟葡甲球會科瓦彼達迪的同時，東方簽下能出任中場及後衞的20歲菲英混血小將佐敦查維斯，今仗可望候命。

郭嘉諾力爭3分扭轉形勢

同樣在菁英盃未響勝鼓的佳聯元朗，主教練郭嘉諾預計今仗雙方均會力爭全取3分，以扭轉小組形勢︰「目前我哋兩隊處於榜尾，點都想試吓仲有冇機會，相信『牛丸』都咁諗，尤其佢哋兩個盃賽出晒局。如果我哋今場波攞唔到分嘅話，剩番兩場都仲有搶分機會。我哋有啲球員接近收成期，例如重點培訓嘅李靄軒同埋黃本煒，希望畀到佢兩個多啲機會。」

元朗目前有不少傷兵，除卡立及葉子俊因傷缺陣外，陳嘉豪、羅振庭及陳柏衡亦有不同程度的傷勢，「郭Sir」或要安排原本休息的法比奧落場。

（周日下午2時30分開賽）

東方龍獅新兵 佐敦查維斯	理文前鋒 梁嘉恆	冠忠南區後衞 許宏鋒

理文激鍊冠忠南區

尾場B組理文遇上冠忠南區，理文近期走勢不俗，面對香港飛馬、東方龍獅及傑志3支勁旅，錄得1勝1和1負，包括菁英賽首戰2比0擊敗飛馬。主教練陳曉明揚言要繼續贏落去：「菁英盃係我哋一個好大嘅目標，我哋一路出緊嘅陣容，余煒廉、鄭兆均都係菁英盃適齡球員，所以對呢個盃好有期望。分組賽首場咁辛苦贏到飛馬，唔希望斷送之前嘅努力，只要今日再贏，我哋就有好大優勢！」「陳Sir」補充兩名新外援尼迪利及沙普夫融入情況理想，中堅雲貝基的復出亦有助球隊調兵遣將。

鄭兆聰盼重拾信心

踏入2019年重返「地頭」香港仔運動場，便擊敗傑志的冠忠南區，隨後作客不敵榜末球隊凱景，未能登上港超榜首。主教練鄭兆聰坦言士氣難免有影響，卻強調球員表現已盡力，現時只會繼續前進︰「如果因為態度唔好或者輕敵而輸波，就係好大問題，但我覺得對凱景場波只係成場波踢嚟好唔順，唔關球員態度事，希望嚟緊呢兩場菁英盃，可以打番起狀態及信心。」快將傷愈復出的高美斯，近兩周已如常操練，雖然他希望能以最佳狀態上陣，但不排除因應臨場戰況安排其落場。

（周日下午5時30分開賽）

何彥霆報道