凱景重育苗多過戰績 陳文俊路難行，但行啱咗！！

上季中在元朗擔任「達Sir」曾昭達副手的陳文俊，應時任凱景會長兼教練「大頭文」馮凱文之邀，以球員身份加盟。「踢咗兩個零月，知道凱景有升班嘅計劃，心諗既然凱景升班，咪跟埋一齊升囉！橫掂我一直有Keep住操，對自己體能好有信心。」就是這樣，陳文俊的名字最後出現在凱景的港超大軍名單中。

17歲簽約快譯通成為學徒球員，18歲在快譯通正式展開職業球員生涯的「文俊」，先後效力過花花、公民等多間港甲球會，經驗豐富，絕對適合在凱景擔任助教兼球員的角色。「我唔係咩球星，但都踢咗咁多年，起碼喺臨場同實戰方面嘅經驗，可以幫到後生仔，呢樣亦係『大頭文』搵我同『富仔』（即凱景助教兼球員黃耀富）兩個幫手嘅原因。」「文俊」和「富仔」兩人在香港5人隊，由球員身份到轉任教練，前前後後合作超過13年。

「出多幾個孫銘謙靠球迷」

「文俊」說：「5人足球其實好多學問，對球員嘅要求同大波好唔同，當中好似『預測對手』同傳球走位呢啲，若果掌握到對踢大波會有好大幫助，我好想將自己喺5人足球上邊識嘅、用得着嘅，同凱景一班後生仔分享，希望幫到佢哋成長。無論係同佢哋一齊落場，或者平日練波，我都會提佢哋應該點或者唔好點。」

「我認為要畀多啲年輕球員上陣，始終要踢得多先會進步，成績預咗唔會好，呢個係凱景會方嘅選擇，球季踢咗4個幾月，我哋條路雖然好難行，但係行啱咗。護唔護到級？唔諗啦！最緊要大家爭氣，亦希望多啲贊助商同球迷支持凱景，因為咁樣先有機會出多幾個孫銘謙。」陳文俊感慨地道。

誠意推介實5師弟

身為一班凱景年輕球員的大師兄，「文俊」特別向球迷推介5位師弟，他說：「球隊喺積分榜未贏過，得1分包尾係事實，但畀到年輕球員上陣機會，令佢哋成長同進步，呢啲亦係大家眼見嘅。有成績又出到年輕球員當然最理想，但若果淨係做到一樣，咁畀到小將成長同本地球員出場機會緊要啲。」

中場黃子俊

之前踢東區嘅佢，操練態度好好，好勤力，非常尊重足球員呢份職業，落到場亦好落力。但喺協防嗰陣有啲急，未夠精，要磨練多啲。」

中堅杜瑋鴻

佢唔係十八廿二，但好開心見到佢有好大進步，好放膽去指揮隊友防守，若果可以對自己同隊友再有要求啲，發揮會再好啲。

右後衞廖偉業

佢仲好後生，我最開心係佢終於搵到機會表現自己，喺後衞呢個位置上，充分發揮到速度同膽識。再練大隻啲，應該有排踢。

前鋒孫銘謙

2000年出世嘅佢，雖然好細個，但落到場好大膽，一啲都唔驚，射術亦都唔錯。不過有時就飄忽啲，同傳波馬馬虎虎，改善到，呢個細路不得了！

右翼廖智謙

佢都好Young，1999年出世嘅佢，雖然落場機會未算好多，但一有機會佢都好敢踢同好肯踢，有速度技術亦好，係奀咗啲，練番大隻啲，唔憂冇得踢。

文：戴陶蔚