冼家裕揀球員似揀衫！
夢想FC教練冼家裕近年積極為球壇培訓生力軍，今季冒起的新星彭林林便是他的門生。在場外與好友朱兆基一同經營古着店美華氏的他，認為挑選球員和時裝都有共通之處：「我揀衫會睇款、顏色，拼出嚟個效果OK喎，就好似睇球員咁，可能我鍾意佢嘅心態、技術、打法符合到我要求。」
除了日常訓練外，「冼Sir」空閒時需到店內處理大小事務，問及教波難還是做生意難時，他坦言：「兩樣都難，賣衫係潮流嘢，好多變數預計唔到，所以做生意會有衝擊；教波面對唔同問題，唔同年紀有唔同教法，不過教波我掌握得好少少。兩樣嘢有唔同，做生意會影響收入，壓力大啲。開呢間古着店時，有個由細玩到大、做呢行做咗好多年嘅朋友帶住做，輕鬆好多、易好多，依家我都係學嘢階段，因為依家賣古着唔係咁容易，加上好多設計都係靠我個朋友同佢嘅團隊，不過當中我都有好多得着。」
做生意經驗幫到教波
做生意，永遠不會一帆風順，就正如球隊一樣，總不會是長勝將軍：「除咗賣衫，我都試過賣薯條，我人生經驗豐富啲，見識到高低潮，就識點樣去解決困難，呢方面可以同足球扯上關係，好似連輸十幾場後，要諗方法改善成績，正如生意唔好要諗方法改善、做番好。」「冼Sir」道。
當被問到夢想FC隊中哪位最潮，「冼Sir」笑言：「嘩，最潮呀？如果計打扮，我覺得我哋個管理『傻強』個造型比較突出少少，好似舊年聖誕節周年晚宴，佢都扮耶穌，比較出眾。」風趣幽默的他又謂不會強迫球員到店內選購衣飾：「自己鍾意咪過嚟睇吓囉，唔會逼佢哋過嚟嘅，佢哋鍾意、覺得幾靚就會搵我，Jordan（即球員林樂勤）、黎厚希都有嚟買吓嘢。」
冼家裕Profile
出生日期：1978年4月2日
職位：教練
曾效力球隊：五一七、東聯二合、流浪、大中、愉園、保濟職業
曾執教球隊：愉園(助教)、鹿特丹斯巴達(淦源)
現執教球隊：夢想FC
圖：何彥霆／文：陳焌鏗