藍綠戰和富大埔險勝

15分鐘，久違了的「賜B手榴彈」出現，楊賜麟右邊界外球掟入禁區，艾華度衝前一跣，皮球遠柱入網，和富大埔領先1比0。落後的東方龍獅於29分鐘扳平，艾華頓接應隊友的界外球，右邊犄角位抽成1比1。惟此舉惹來和富大埔球員和後備席不滿，指艾華頓接應之界外球，為他們發現有隊友因傷倒地才踢出邊線，東方龍獅未有將皮球掟回乃欠缺體育精神。至於東方龍獅球員則認為界外球乃和富大埔球員解圍所致，非為讓受傷隊友接受治療而刻意踢出界。事件擾攘近6分鐘，球證湯巨森維持入球有效之判決，賽事亦以1比1結束上半場。

楊賜麟兩度助攻做功臣

下半場首個攻門由麥基主理，49分鐘，他藉速度爆入禁區，趁曾文輝出迎一篤，皮球卻被該門將閂走。之後兩軍雖互有攻守，但具睇頭的攻門要到80分鐘才再出現，當時東方龍獅於進攻右路獲罰球，笠臣主射直飛龍門左上角，曾文輝飛到盡撲出底線。現場觀眾的掌聲未落，東方龍獅已開出角球，迪高近12碼點衝頂，曾文輝再一次飛身神救，維持比數不變。戰至86分鐘，楊賜麟再為和富大埔立功，他上次助攻於禁區外怒射，皮球省中對方球員後，後備入替的大衞拉菲爾禁區內抽入，助球隊以2比1贏波全取3分。

完場後，和富大埔主帥李志堅雖讚旗下球員努力，並為贏波感到高興，卻對球隊所失一球，個別球員的處理手法感到失望，他說：「足球唔應該係咁，不過贏咗波，我都唔想多講，希望唔會再發生啲咁事。」