《我撐本地波》喺FB網上為本地球賽提供文字直播，大家唔使入場都可品味賽事。多人留意咗，球迷亦邊食花生邊做鍵盤戰士觀賽留言。「踢到似學界波」、「降班膽」，爽快宣洩無負擔，但此舉為年輕球員留下不可磨滅嘅傷痕。球員事後上網睇負面留言，黯然關機，輸波，更輸信心。
本地年輕球員大多係18至23歲，初登港超賽場踢波有學界影子其實可以理解，每個人都要時間成長，轉接期好需要大家包容支持，而且球會付出大量心力金錢（回報真係好遙遙無期），開闢平台令一眾本地年輕球員吸取經驗，喺一個比較高強度嘅環境加速成長，一句「遲早降班膽」，打沉咗球隊同球員嘅鬥心。長此落去大家都自我懷疑，香港足球點樣成長？
香港A隊近8成都係入籍兵，本地球員比例可想而知。唔係歧視入籍球員，佢哋實力相對較高，只係如果能睇到多啲「本地薑」代表香港馳騁沙場，作為球迷投入度肯定提升。
球迷嘅支持係非常重要的，一班年輕人鼓起勇氣喺港超比賽同球隊不計回報嘅付出都係值得尊重嘅！大家都係自己人，你唔撐，邊個撐？
凱景名譽會長 AirDefender執行董事 黃浩文