東網直播好戲打孖上

南下鬥和富大埔 富力R&F陸空夾攻

和富大埔上周出戰高級組銀牌8強賽事，並憑黃威開賽初段的入球一箭定江山，以1比0小勝冠忠南區殺入4強。主教練李志堅坦言上仗比賽尾段過程有點驚險︰「上場波睇到球員好集中同有紀律，雖然臨完場畀對手狂攻，個心未必好受，不過好開心可以贏波，亦都希望佢哋保持住呢個心態去踢。」

梁冠聰停賽堅Sir頭痕

「堅Sir」提醒球員要提防富力的高波戰術：「對手有伊達同白鶴等罰球專家，仲有高大前鋒利安高，有條件靠死球攻勢制勝，球隊要好小心去應付。」對於大埔今仗有梁冠聰今季累積5面黃牌停賽，「堅Sir」承認有一定影響：「其實『阿聰』今季喺球隊發揮到好大作用，有一定防守力同穩定性，但以佢嘅位置同踢法有時係要犧牲去拎黃牌。始終球隊往年防中人選比較多，有謝家強同陳俊樂，今年正宗防中就只得佢一個，所以呢方面都要諗點樣應付。」

客軍富力R&F近況極佳，各項賽事錄得4連勝走勢，惟上場比賽主教練楊正光認為球員表現一般。今仗面對上屆亞軍和富大埔，「光Sir」認為球隊需改善組織能力：「上場受到對手踢法、場地限制，其實雙方都難去組織進攻，今場對大埔可能情況會相似，但係我哋都會嘗試多以地面、後場開始組織進攻。仲要小心係對方嘅反擊能力，因為佢哋中前場組織能力高咗，球隊要更加注重攻守轉換嘅反應。」即使對手防守中場梁冠聰停賽，「光Sir」強調不可掉以輕心：「當然對手有主力球員停賽一定會有影響，但係對方亦有好多好球員代替， 所以優勢唔會好多。」

和富大埔隊長 黃威（綠衫）	傑志前鋒 盧卡斯	凱景後衞 廖偉業（紅衫）

富力R&F翼鋒高梵早前受輕傷，惟今周已復操，其他球員均沒有傷病，今仗可「夫添」應戰。

糾正球員心態傑志鬥凱景唔輕敵

傑志上周在高級組銀牌8強戰半場領先兩球，並在下半場大部分時間踢多1人下，最終僅以2比1小勝夢想FC出線，主教練朱志光認為球員比賽心態是問題所在︰「球隊領先兩球後放鬆咗，我哋賽後都有同球員檢討，講畀佢哋知任何一刻都唔可以放鬆，球員諗住咁樣就贏梗，呢啲心態係唔正確。以往未贏得咁多榮譽時，落到場嘅拚搏精神比較鮮明，依家個心態需要糾正番，因為當你贏咗冠軍後，對手對住你嘅時候會加倍努力，比賽就會變得更難應付。」

「朱Sir」亦透露，由於球隊在為期兩周的國際賽後，一周內分別有在主場對富力的補賽，以及菁英盃的賽事，因此今仗會收起部分港隊成員︰「黃洋同丹尼等好大可能喺頭兩場東亞盃外圍賽上陣，衡量到球隊喺21號同24號都有比賽，兩星期內有機會打5場，隊中一啲港隊成員，今仗多數都唔會安排上陣。」

馮凱文：先要「止血」

上仗在聯賽主場迎戰香港飛馬，比賽初段曾兩度領先的凱景，最終以2比6遭對手擊敗，主教練馮凱文認為球員的集中力有待改善︰「始終球隊今季未試過領先，大家領先時都唔集中，去到下半場好快就輸到2比4，成隊波有少少洩氣，跟住接連犯錯導致大敗，比數方面固然係失望，但要知道問題所在，再重新檢討過。」

今仗保羅、安基斯及金東進因借用條例無法上陣，「馮Sir」表示防守會有所加強︰「球隊最近兩場波失咗11球，所以首先要『止血』，始終失波愈多，對信心同士氣都有好大影響。」

凱景目前有陳文俊及隊長杜瑋鴻受傷上陣成疑，至於孫銘謙及歐文洛正代表理工大學，出戰於福建晉江舉行的亞洲大學生體育聯會第一屆亞洲盃賽事，今仗將會缺陣。