銀牌8強鍊餐飽
「高級組銀牌」今午續演兩場8強賽事，頭場下午2時30分假旺角大球場舉行，由傑志對夢想FC，尾場下午5時30分於青衣運動場上演，由冠忠南區與和富大埔合演「地區打吡」，爭奪4強席位。
鬥夢想FC 傑志出招博反彈
月中獲上季足球先生華杜斯回巢的傑志，聯賽近3仗均告和局收場，且先後領先佳聯元朗及和富大埔兩球下遭追和，主教練朱志光表示，已針對相關情況在訓練中作調整。
朱志光表示︰「球隊踢法上要控制得好啲，傑志過往領先下畀人追番嘅情況唔多，下半場領先後對手未能反撲嘅情況高達8成。球員犯錯就去更正，經過多啲比賽先可以調節到心態，球隊比賽時攻守轉換未做到最好，今個禮拜都有針對呢樣去調節。盃賽係一場過嘅賽事，乜嘢事都可能發生，對手又冇壓力，相信球員都知道要更加集中。」「藍鳥」有上仗撞傷眼角位的費蘭度要視乎康復進度，才可決定能否上陣，至於早前拉傷肌肉的鄭展龍，目前仍單獨進行恢復操練。
梁志榮：最緊要一條心
首圈憑互射12碼擊敗香港飛馬進身8強的夢想FC，目前在聯賽尚未打開勝利之門，上場作客佳聯元朗更遭對手以5比1大炒，主帥梁志榮認為球員先要提升自己比賽時的心理質素︰「今季開季唔順，班球員個心理狀況同鬥志都需要改善，佢哋成日都驚輸波同怕出錯，結果落到場踢波太過避忌。教練團今個禮拜有同球員傾過偈，叫佢哋唔好咁緊張，成隊波要一條心、要團結。波係逐場逐場計，希望佢哋可以有番信心先。」
「細榮」透露，周中復出在預備組上陣半場的隊長陳偉豪，今仗仍未能趕及上陣，林衍廷則因病缺陣，至於陳皓駿就因左手骨折養傷4至6周。
再遇冠忠南區 和富大埔要復仇
和富大埔月初於聯賽對冠忠南區久攻不下，最終戰至補時階段遭對手絕殺。球隊上仗作客對傑志在半場落後兩球下，憑哈利及杜度入波追成2比2平手，主教練李志堅認為在如此情況下搶得1分，對士氣有莫大提升。
「堅Sir」說︰「我唔覺得和咗場波係一個好大嘅成就，不過喺咁嘅情況下，算係好寶貴嘅經驗，尤其上半場球隊表現同氣氛都唔太好，失咗啲大意嘅波，下半場證明大家係可以踢番好嘅表現，呢樣好關鍵。上次對南區球隊唔係踢得唔好，只係做法錯咗，大家太想贏波而唔夠冷靜，今次對壘係聯賽同盃賽嘅分別，盃賽一定要分勝負，有機會加時同12碼，所以部署會喺呢方面着手。」
Ricky Sir堅有信心
至於開季聯賽4連勝的冠忠南區，上仗在高美斯、狄卡奧及迪亞高分別因傷停缺陣下，以0比2不敵東方龍獅，儘管不敗身被打破，但主教練鄭兆聰（Ricky Sir）對球員表現感滿意︰「上場賽前我哋知道缺少咗幾個主力，大家都要走多步，同埋戰術上嘅發揮要好有紀律。我覺得球隊發揮理想，最後輸波係有啲唔抵，但足球有時就係咁樣，踢得好未必攞到分，有時踢得唔好都可以拎到分。」
「Ricky Sir」續道，自己對球隊投下信心一票︰「球員練習時睇見佢哋嘅努力，心理同體能上都準備好應付呢場波，多咗狄卡奧同迪亞高呢兩個選擇，對球隊好有信心。」