梁智駒樂做湊仔公
許多人都說新一代年輕人難溝通，但其實只要願意花時間去融入他們的世界，或許你會發現，新世代的人有他們的可愛之處。夢想FC這支球隊，無論球員和其他部門，都有不少年輕人參與其中，上任行政總監（CEO）超過1年的梁智駒，笑言這份「湊仔公」工作充滿樂趣，更表示：「有時我都唔知佢哋諗咩！」但這個特別任務，亦令他從中學到不少。
「同佢哋溝通，唔同以前o架啦！以前可能鬧啊，打都有啦，自然就聽話。依家呢一代就要氹吓佢哋，同佢哋傾偈。有啲球員把口點撬都唔開，但只要溝通多啲，佢視你為朋友，就會好好多。」去年出任夢想FC的CEO，梁智駒曾笑說自己是「湊仔公」，經過1年時間，「駒總」認為自己尚算稱職，但要完全了解年輕人的想法，着實不容易：「有時我都唔知佢哋諗乜嘢，佢哋講完畀你聽，我就會諗，乜原來咁都得？」為了更努力去融入他們，會定期舉辦聚餐和BBQ等活動，希望以朋友角色去理解新一代。
巿場部學溝通技巧
自言溝通已經有7、8成功力，原來「駒總」不少溝通技巧是從球隊的巿場部學回來：「上年我哋請咗4個大學生去做marketing，佢哋諗嘅嘢我都覺得好特別，思維係好前衞同創新。睇完佢哋嘅出品，我都覺得自己跟上潮流，果然係要互相學習。」世界每天都在一點一滴改變，作為CEO，梁智駒自然要跟上年輕人的腳步，在夢想FC這支年輕球隊工作，給予他緊貼潮流的機會，與年輕人一起進步！
目標助子弟兵入港隊
對於一班年輕球員，「駒總」亦寄予厚望，特別上季初段成績不俗，但他認為，年輕球員心態有待改善：「我覺得年輕球隊都係咁，始終都係經驗唔夠，心態係差啲，失一球就無乜信心。」但當初球隊就是希望成為培育年輕人的平台，作為CEO，除了希望今季有好表現外，他亦有一個最大願望：「想我哋嘅年輕球員入到香港隊，呢個係我哋嘅目標。」
增設宿舍讓球員健康relax
「雖然我唔會理佢哋私人時間會做啲咩，但都希望佢哋自律，球隊啱啱整咗個宿舍，就係想一班年輕球員練完波唔好周圍去。」梁智駒稱。夢想ＦＣ第二年征戰港超，對於隊內年輕球員，球隊十分重視，今年更為他們準備宿舍，在練習後的閒餘時間，為球員提供放鬆休息的地方。
為配合年輕人的興趣，球隊在宿舍的設備十分齊全：「我哋宿舍都有晒佢哋想要嘅設施，遊戲機、健身器材、按摩椅等，遲啲可能會有麻將打。其實最主要唔想佢哋練完波周圍去，想佢哋休息，上面有得休息、可以喺宿舍打吓機，健吓身，佢哋想要嘅我哋都畀晒。」
唔鼓勵球員夜蒲
「駒總」亦希望，球員可以盡量減少陋習，為自己的未來好好打算；「足球員要放鬆，可能會選擇去飲兩杯，但我哋唔鼓勵，球隊都有規定，球員唔可以去夜蒲。」好習慣由年輕開始培養，相信夢想ＦＣ能在未來培養出更多好球員，為香港足球出一分力。
圖/文︰王藝霖