勁呀!!香港女足秦正行加盟史雲斯

香港攻擊球員秦正行之前效力傑志女子隊，今年3月同隊友劉蕊澄齊齊征戰澳洲次級聯賽。雖然當地球會只會提供各式津貼及支援予秦正行，但呢位熱愛足球嘅女子球員並無介意，因為佢好希望知道，自己嘅能力可以喺球壇「行到幾遠」。

有機會踢歐聯外圍賽

花名「阿青」嘅秦正行話，加盟威爾斯球隊係夢想成真，但都要面對實際困難，就係錢嘅問題：「因為之前去到澳洲踢波，令到積蓄都使咗七七八八。早前都知可以去英國球隊試腳，但因為真係冇錢，而我知道史雲斯女子隊唔使試腳就可以加盟，所以就決定加盟。呢間球會好好，話已經幫我搵到份工，而且又有地方畀我住。」講到目標，阿青話：「當然係希望幫到球隊攞冠軍，因為可以踢女子歐聯外圍賽。個人嚟講梗係想入波啦！」

威爾斯女子足球聯賽於2009年成立，係當地第一個，亦都係最高級別嘅女子聯賽，共有10支球隊參加，冠軍可以參與翌屆嘅女子歐聯賽事，而史雲斯女子隊曾三奪威超錦標。