落場比賽梗係要知己知彼，主隊印尼因為西班牙籍印尼U21主帥Luis Milla，仲喺祖家未肯歸隊，今次要搵土炮教頭Bima Sakti頂住檔領軍，而且徵召咗外流馬來西亞超聯吉打嘅進攻中場Andik Vermansah，代替被逐出集訓營嘅阿根廷裔歸化中場Esteban Gabriel Vizcarra，星期一仲急Call左翼衞Abduh Lestaluhu，代替受傷嘅Rezaldi Hehanussa，陣容方面都有一定變化。
入籍大叔有料到
值得注意嘅係，印尼上星期主場友賽緬甸大勝3比0一戰，22歲翼鋒Irfan Java表現突出，個人梅開二度，呢個身高只得1米62嘅球員，講到明希望爭入11月鈴木盃大軍（東南亞錦標賽），肯定會搏晒老命，況且佢就係喺亞運分組賽射入扳平一球，令香港隊反輸1比3嗰個，可以話係港隊頭號「仇人」。至於37歲歸化國腳「Beto」Alberto Goncalves da Costa，呢位1米75嘅巴西裔前鋒，早前都踢過雅加達亞運，大家應該認得呢個大叔。「Beto」對緬甸都頂入一球，狀態似乎唔差。