不經不覺已喺廣州生活咗三個月，由最初每次出街只識搭的士，到依家已識得坐地鐵往返大學城區，除可避免塞車外，價錢亦平好多。其實廣州嘅地鐵都算乾淨，淨係上車嗰陣會比較混亂啫，哈！哈！
之前接受香港體記朋友嘅訪問，我都講過唔少關於富力球會嘅設施同配套嘅事，但就好少提及我哋基地嘅所在地。我哋基地所在嘅地方叫大學城區，當中有13間唔同嘅大學，可能周圍都係大學生，所以環境畀人感覺好清靜、淳樸同幾舒服。而且交通都幾方便，去廣州東或南站，車程都係30分鐘，球員同我往返香港都好快好方便。
講番球隊嘅表現，連贏兩場之後對球隊上下無疑增強咗信心，之前我亦講過今季港超聯會係近幾年整體實力最平均嘅一年，好多隊都具備爭標嘅實力，入球數字亦反映出賽事嘅可觀性。球季只係啱啱開始，自己亦不敢怠慢，加緊提升球員嘅狀態同陣上嘅默契，相信我哋一定可以發揮得更好，希望大家可以支持我哋，謝謝。
富力R&F主教練 楊正光