東方龍獅遇夢想FC有惡鬥
今日港超聯尾場東方龍獅於主場香港大球場鬥夢想FC。兩軍上輪聯賽均於末段出現峰迴路轉一幕，惟命途各異。東方龍獅銳意重回勝軌，夢想FC則望再創驚喜，料有一番龍爭虎鬥。（周六下午5時30分開賽）
牛丸：要全取3分補數
東方上輪聯賽臨完場前被傑志逼和1比1，主教練陳婉婷揚言要於主場贏波：「上仗失分固然失望，但環顧整場比賽，和波都合理，士氣冇大影響，希望今場可以全取3分。」球隊兩戰雖失掉3球，但「牛丸」認為整體已見進步：「球隊防守不斷改善中，但仍需注意由攻轉守嘅反應。」連續兩戰均出現12碼「宴客」情況，「牛丸」會否安排其他球員處理？她笑言：「喺邊度跌倒就喺邊度起身，主要都要畀番兩位前鋒負責。」東方龍獅目前只有黃梓浩一名傷兵。
夢想FC上輪兩度落後下，最終憑年僅20歲的彭林林尾段美妙入球，2比2逼和大埔搶得1分，主教練梁志榮表示：「今場可能會有一兩個位置變動，因為隊長陳偉豪身體不適要休戰，希堅奴亦未完全康復，但踢法上會堅持控球及逼搶為主。」問及「細榮」還有多少秘密武器，他笑謂：「冇咩秘密武器，有需要時就換入一啲適合嘅球員，機會係要佢哋自己爭取。」
陳焌鏗報道