夢想FC香港飛馬再相逢
今季本地球壇首個主要錦標「高級組銀牌賽」，今晚旺角大球場揭開戰幔，夢想FC與香港飛馬繼港超首輪後於銀牌首圈再遇。兩軍上輪聯賽同告力戰而敗，及後操練亦受颱風「山竹」影響，不過雙方主帥均認為無礙球員今仗爭勝決心，誓搶8強席位！（周四晚8時開賽）
早前在颱風「山竹」吹襲下，本港多處遭受破壞，面對突如其來的天災，夢想FC主教練梁志榮表示儘管少了課操練，惟影響卻不大。球隊今季聯賽仍未搶得分數，今仗再遇聯賽首戰對手香港飛馬，「梁Sir」指球員信心未受打擊：「上兩場聯賽輸波，其實喺細節上，特別係補位方面有不足，加上球員唔習慣『撳』住人嚟踢，其實呢兩場波嘅表現，同上季下半季相比進步咗好多，特別係埋門次數多咗，呢樣嘢係值得開心嘅。」
與此同時，「梁Sir」亦樂見球員態度正面：「上場睇到球員爭勝心好強，希望佢哋每場波都有呢個決心，就算一路輸落去都好，呢種心態係作為職業球員應該有嘅。」
飛馬主帥：防守不容犯錯
對於未能在周一如常操練，飛馬主帥柏度強調球隊上仗不敵和富大埔，及時糾正問題才是最重要︰「少咗一課訓練，我哋都冇辦法，不過睇番上場對大埔嘅片段，發現喺邊度出錯，就要作出修正。上場最大問題係7分幾鐘就落後兩球，仲要對住大埔更難追，雖然最後有球12碼冇吹罰到，我明白球證都係會犯錯嘅，但球隊嘅防守犯錯就唔可以接受。」
香港飛馬除麥保美日前發燒不適而沒有參與操練外，隊中未見其他傷兵。首輪聯賽飛馬曾以4比1大勝夢想，柏度明言沒有輪換的念頭︰「始終每場波都唔同，特別係喺碰過頭後，兩軍互相間嘅認識都深咗，加上盃賽變數更大，所以都會繼續用番之前嘅陣式同人腳。」