袁振昇不求安穩但求ShowOff
第三季南下征戰港超聯的富力R&F，今季大舉簽入多名本地戰將，其中一位就是上季才踏上職業路途、效力和富大埔的前鋒袁振昇。「昇仔」選擇離開，全因對自己有要求：「其實同富力喺半季時溝通過，當時都嚟過呢邊睇下環境，我覺得個環境幾適合踢波。今季陣中有好多有經驗嘅球員，希望藉呢個機會表現自己，同時提升個人能力。」
去季因為夢想放棄穩定的銀行工作，毅然走上職業足球員這條路，家住大埔的他回味在和富大埔的日子：「我覺得第一年轉職業就可以踢大埔係一件開心嘅事，因為當年踢幼苗都係喺大埔開始，估唔到咁多年後又可以踢番。所以喺大埔時感覺比較親切，因為本身教練同球員都認識一段時間。」他亦感激恩師、和富大埔主帥李志堅的提攜：「好多謝佢！第一年踢職業就遇番佢，佢畀咗好多意見我，亦都教識我點樣喺球圈生存。」
一季過去，昔日在港甲為晨曦入40球的「昇仔」，坦言自己在港超還未達標：「其實經過第一季後，我覺得自己有好多不足之處，最重要係心態，希望今季可以調整到，同埋將自己能力提高。自己體能、體力都未達到職業水平。」問及去季哪件事最難忘，「昇仔」回答：「最難忘一定係第一場後備入替入第一球波！ 其實一上場都有啲緊張、節奏好快。當時同自己講千祈唔好弄失控球權，但當時已經落後冇乜嘢可以輸，於是同自己講要把握好機會，好好彩，最後把握到一個補射機會。」
自信心爆棚唔怕爭位
今季轉投富力後，與主教練楊正光初次合作，「昇仔」對「楊Sir」讚不絕口：「佢好盡心盡力，比賽前會同我哋溝通好多，同埋好多細節嘢都會喺訓練度睇到，畀好多意見我。」談到今季目標，他謂：「今年個目標係爭取多啲上陣時間同為球隊贏得錦標！」隊中擁有利安高、基奧雲尼等進攻好手，一樣司職前鋒的「昇仔」不但沒有因此畏懼，反而刺激他要做得更好：「我唔想用競爭形容，但希望自己可以盡力，期望有突出表現，證明畀教練睇自己可以佔一席位。」
留學體驗幫到踢職業
袁振昇求學期間曾遠赴英國留學，今季為了足球，需要長駐廣州。再次離開家人，「昇仔」稱在英國的經驗有助他繼續發展：「當年為學業，依家為事業，個感覺完全唔同。因為依家我有得選擇足球作為事業，我希望可以喺一個更好嘅環境提高自己嘅足球水平同知識！諗番起細個出外讀書，第一次離開屋企會唔捨得，不過亦正正因為當時學會獨立同照顧自己，所以依家出去做嘢都比較容易適應。況且依家球隊都有好多香港人，大家互相有個照應。」
袁振昇Profile
出生日期：1993年2月16日
身高：1米83
體重：75公斤
位置：前鋒
曾效力球隊：晨曦、和富大埔
現效力球隊：富力R&F
球衣號碼：32
圖/文：陳焌鏗