石偉雄返母校變番小學生
於雅加達亞運歷史性衞冕男子跳馬金牌的石偉雄，昨日重返母校油蔴地天主教小學（海泓道）作交流及分享，師弟妹們全情投入，大合照時「石仔」身處一片「橙海」之中，被他們的活力感染：「好開心，好有歸屬感，返到嚟好似自己都變番小學生咁！」
昨日「石仔」獲師弟妹「英雄式」夾道歡迎出場，台上播出「石仔」奪金片段精華，亦看到小學生不停尖叫，使重返舊地的「石仔」回想學生年代的難忘經歷：「最記得係小四至小五，我喺走廊撳住兩張枱當雙槓咁擺，當時畀老師鬧，都唔知佢哋好嬲定好笑。每日放學都去奧海城搭小巴到旺角火車站，再到火炭體院練習，所以小息就會做定功課，如果比賽返唔到學，老師會幫手追進度，所以都想多謝所有老師同主任，冇佢哋支持，我嘅體操生涯都冇咁順利。」
恩師讚捱得苦
油天由2000年開始增設體操班，當時任教體育的楊增海老師指「石仔」應記一功，事緣當年石媽媽於家長日向老師談起「石仔」於校外的體操成績，正值學校有意推行多元化教育，結果體操班成立後至今從無間斷。昨日楊Sir亦特別現身與「石仔」話當年，現時仍於學校代課的他透露，「石仔」當時已是學界獎牌保證：「佢好好動，覺得佢好有精力，所以無論籃球、田徑、4X100米接力等都派佢比賽，有佢就好有希望攞牌！我帶隊或者睇佢比賽，就知佢好有潛質同天分，當時亦已經好捱得苦，呢個性格令佢成功。」
「石仔」多年來有空都會返母校探訪，他昨日讓師弟妹近距離接觸亞運金牌，以及接受小記者「訪問」，學校體操隊成員更即場在他指導下做「平板支撐」。看見師弟妹們用不盡的精力，「石仔」笑言相信他們是未來體操界的希望。休息約一星期後，「石仔」現已復操，惟強度仍有限，10月尾會出發到多哈參加世錦賽，他坦言屆時只希望做好自己本分，未有訂下目標。
圖/文：袁志浩