街波聖地演籌款賽為無家者代表壯行
無家者世界盃香港區籌款賽今日於旺角麥花臣遊樂場展開，本屆賽事共33支球隊參賽，當中包括2018無家者世界盃香港代表隊。今屆香港代表隊由溫遠雄出任主教練，「溫Sir」期望藉籌款賽能讓球員成長：「希望佢哋透過比賽心態上獲得進步，適應呢種嘉年華式、好多觀眾嘅比賽，做到呢樣嘢已經好夠。名次唔重要，因為真正比賽會有唔同級別嘅賽事，最緊要心態點應付。」
與往年一樣，籌款賽於麥花臣遊樂場這個「街頭足球聖地」舉行，下午2時起開賽，「溫Sir」盼籍此預演世界盃：「球員透過訓練熟絡咗，愈嚟愈明白呢個比賽嘅意義，亦了解戰術、踢法背後嘅原因，所以佢哋依家信心都有所提升。去到比賽時，節奏快、體能消耗大嘅情況下，加上緊張可能會有啲犯錯，但呢部分先係佢哋最需要面對嘅事。到佢哋真係入選決選名單，喺外地陌生環境下比賽，對手會更強、場面會更大嘅時候，球員點去應付各種壓力，就係呢個比賽意義！所以我要求佢哋學識抗壓，同做好自己。」
為備戰是次籌款賽，「溫Sir」亦刻意從訓練上作出調整：「訓練接近兩個月，球員都陸續熟習無家者世界盃嘅踢法，今次籌款賽之前兩個禮拜都係友賽為主，等佢哋將練習所學到嘅嘢，喺真實比賽上發揮番出嚟。友賽對手係之前嘅師兄，畀佢哋慢慢熟習比賽節奏及對抗性，嚟到籌款賽就容易適應啲。」
球員聽話 「20揀8」最難
無家者世界盃香港代表隊決選名單將於籌款賽後公布，這才是「溫Sir」面對的最大難題：「大家態度都好好、亦好聽話，愈練就愈覺得難抉擇，最終只有8個人入選，落選者必然會失望。每年都唔同，今年要喺20人入面挑選8個，個個都練得好足、好積極，惟有希望一班球員學習到面對入選同落選嘅心情。」
名宿球星落場力撐
今屆無家者世界盃籌款賽與去年一樣，繼續有不少本地足球名宿參與，如歐偉倫、鄭少偉、黃展鴻、梁智駒及梁志榮等。現為夢想FC主教練的梁志榮，以往曾帶領港隊出戰，他表示：「我以前都帶過無家者世界盃香港代表隊，呢班人好乖、好值得去幫助佢哋去完場呢個目標。佢哋之前雖然做過啲唔好嘅事，就算點錯都好，佢哋都承擔咗自己嘅責任，應該畀個機會佢哋去改過、去追尋目標攞番自信。」
夢想球員實行寓賽於操
除本地名宿外，港超球會夢想FC一班現役球員如屠俊翹、彭超然及朱偉鈞等，亦親身參與這件有意義的事。「梁Sir」期望他們寓賽於操：「我相信我哋年輕嗰班球員都係踢小型球出身，今次比賽正好畀佢哋當做季初鍛煉！」無家者世界盃香港區籌款賽於今明兩日進行，其中on.cc東網明日早上10時30分起，與賽會Facebook專頁聯合直播，還望球迷踴躍支持，為香港代表隊打氣！
文：陳焌鏗