on.cc東網直播理文鍊傑志 睇猛帥強援點堅！

早於去季季尾便宣布由陳曉明出任新帥的理文，新一季銳意躋身港超「Top 3」，今夏大舉增兵，6月初已搶先落實前南韓國腳白智勳加盟，隨後亦引入干沙利斯、雲貝基及戴倫度合共4位新援。

曉明Sir：決不死守

球隊先後前往昆明及曼谷進行集訓，曾任香港及澳門足總技術總監、領軍經驗豐富的「曉明Sir」表示，球員於泰國集訓後，狀態及默契均有提升，又強調面對實力較強的傑志，不會只着重防守︰「對手有好多球員狀態好好，如果講個人能力，對手一定秤先。我哋希望以團隊制勝，會盡量針對佢哋嘅強項進行部署。賽果唔重要就假嘅，當然呢場波會有微調，正如我哋上場對曼谷聯，都會試吓唔同嘅防守方法，但當然唔會違背自己理念。我哋比較多年輕球員，佢哋未必接收過好多足球資訊，所以今晚打成點樣，好視乎球員自己信心。」

今夏人腳變動較大的傑志，儘管有華杜斯、辛祖、福保羅、艾力士、林嘉緯、盧均宜及林志堅等主力離隊他投，同時亦有簽下前利物浦球星施素高、泰迪、鞠盈智及中村祐人等球員，並收回林柱機與羅梓駿兩位借將。「藍鳥」上月赴南韓集訓，期間錄得1和2負戰績，最近兩周於主場分別跟泰國勁旅武里南聯及越南球隊平陽進行友賽，分別取得2比2及3比2的不敗賽果。

「藍鳥」衞冕第一擊

雖然傑志主教練朱志光滿意近兩場友賽成績，但認為球隊仍可有更佳演出︰「球隊進攻始終加入咗新人，流暢度同默契未去到十足，有好大嘅進步空間。」衞冕的「藍鳥」除了艾里奧仍在養傷，早前以超齡球員身份代表香港U23出戰亞運的列斯奧，則有待觀察才可決定能否上陣。「朱Sir」又透露佐迪及鄭展龍兩位「亞運腳」，亦有不同程度的疲態︰「佐迪喺亞運踢咗4場有啲攰，『龍仔』（鄭展龍）就踢咗1場，其餘時間住喺當地，某程度都會受舟車勞頓影響，要再觀察吓。」

合作拍片衝蜂傑仔今晚見

雖然理文與傑志在球場上鬥個你死我活，但兩隊吉祥物就合力拍攝短片為今仗作宣傳，故事交代剛於今夏誕生的理文吉祥物「衝蜂」，獲傑志的「傑仔」邀請在揭幕戰見面，暗示雙方吉祥物今晚會於球場碰頭，為新季開鑼助興。