警車開路港籃出動零障礙!!

香港男籃上仗鬥「巨人」卡塔爾打出漂亮一仗,僅以10分落敗,眾將收拾心情後昨日投入操練,本報記者到離傳媒中心約半小時車程的GOR Cempaka Putih場館採訪港隊操練,場館內外感覺新淨,球員訓練不時展露會心微笑,相當享受。

該場館由羽毛球場改建而成,港隊主教練安慶健大讚:「呢度環境好滿意,地板係新做,燈光亦OK,其實我哋會有兩至三個場輪流用,另外有個舊場有啲似麥花臣。」安Sir指球隊一般情況下不受塞車困擾,因前往訓練或比賽都有警車開路,惟昨日於訓練後欲觀看同組日本對卡塔爾的賽事,乘坐穿梭巴就要花約一小時。

日日同款梁兆華「食到悶」

曾代表港隊出戰台北世大運的梁兆華笑言對選手村的食物「食到悶」:「嘢食冇咩轉變,世大運時兩、三日會轉食物款式,但呢度每日都一樣,得啲乾雞肉及牛肉,唔係好慣。」早前有傳選手村床位長度不足,港籃一眾「長人」有否受影響?梁兆華就拆解疑團:「間房同床都唔錯,選手村更有健身室及遊樂室,可以打下乒乓波,加上天氣乾燥有啲風,個人冇咁易攰。」