滑翔傘首登場港隊亞運搶牌
「I believe I can fly」，翱翔天際是不少人的夢想，今屆雅加達亞運歷史性新增滑翔傘賽事，這個被稱為「最平飛行器」的運動究竟點玩法？即刻話你知！
滑翔傘於亞運將舉行越野競速及精準定點降落兩個項目，港隊昨日會見傳媒，公布將派出5男1女出戰。越野競速要求選手於空中圍繞坐標進行比賽，總時間最快者獲勝。成員趙浩南表示考驗腦力及耐力：「飛差唔多3小時，要觀察天氣變化，搵上升嘅氣流同埋風向，亦會好似單車公路賽咁用好多戰術。」
香港越野男子團體於亞洲排行第5，此行有力爭牌，相反女子隊就由蔡麗賢獨自出戰，儘管分數上輸蝕，有11年經驗的她仍堅持參賽：「計分上我嘅『隊友』會計0分，所以好難贏，但我目標係話畀大家聽，香港都有滑翔傘運動員！」滑翔傘比飛機便宜，一個袋便可飛最多400公里，不過卻存有危險性，港隊成員李業慈亦在訓練中拗柴，可是他決心繼續飛：「任何運動都有危險性，但我享受自由自在，玩滑翔傘係人同大自然融為一體。」
香港滑翔傘代表隊名單
定點降落個人男子組：任智偉
越野競速團體男子組：趙浩南、李業慈、錢明威、王錦威
越野競速團體女子組：蔡麗賢