港足大師兄林嘉緯歸位
正積極備戰亞運的香港男子足球代表隊，昨日於石硤尾公園舉行操練，東方龍獅三子姚浩明、謝朗軒、林嘉緯，以及效力中甲梅州客家的徐宏傑齊向港隊臨時主教練郭嘉諾報到，惟傑志的鄭展龍、佐迪及列斯奧因隨球隊到南韓集訓，將不會隨港隊到廣州集訓，至於陳俊樂則在廣州集訓期間才歸隊。
對上一次出戰亞運已是2006年多哈亞運的林嘉緯，今屆以超齡球員身份出征，「嘉緯」表示期待：「第一次以超齡球員身份出戰，感覺好新鮮，見到師弟，有少少似返咗以前自己踢亞運嗰時。」
郭嘉諾:全隊夾得好好
由於賽會抽籤時抽漏阿聯酋及巴勒斯坦，經一輪風波後把巴勒斯坦編入港隊身處的A組，阿聯酋則被編入E組。因組內隊伍增加，男足賽事要提前於下月10日展開，打亂港隊部署，大師兄「嘉緯」表示：「早咗開戰對球隊備戰一定有影響，不過自己季前訓練以提升體能為主，相信同港隊訓練分別不大，當然比賽狀態差啲，呢樣真係冇得呃，希望盡快融入球隊，了解年輕球員踢法。」
至於首次出戰亞運的徐宏傑，亦因縮短了備戰時間而焦急：「我都想快啲返嚟練多啲，依家時間倉卒咗。不過上季踢聯賽時都知道大家踢法，所以默契都有嘅，希望可以有好成績。」徐宏傑完成這課操練便即日返回梅州，下月4日才正式歸隊。
外界擔心港隊一直唔齊腳影響發揮，但郭嘉諾表示早前於泰國集訓後對球隊更有信心：「成隊夾得好好，相信「嘉緯」好快融入球隊，加埋全能中場「樂仔」協助攻守，三線實力都幾平均。」