莫斯科華人集氣 齊撐戰鬥民族！
華人足迹遍布全球，點少得莫斯科！「肥金」今次喺莫斯科搵嚟幾位華人，同佢哋講當地生活點滴之餘，亦大偈波經，結果幾位不約而同今晚都力撐俄羅斯，梗係喇，東道主喎！
遊俄KOL鍾意靚仔高路雲
俄國旅遊達人「羅素的紅」Caitlyn Wong今次因世盃而第10次踏足俄羅斯，即使對足球一竅不通，但當佢現場觀戰後，迅速變成超級球迷：「我連球例都唔太識，今次入場全因由我最愛嘅國家主辦，估唔到氣氛咁熱烈，你會不自覺同身邊嘅球迷跳舞慶祝，呢啲就係比賽吸引之處。」問到今晚大戰，Caitlyn當然力撐俄羅斯，尤其係中場高路雲，原因好簡單，靚仔。
喜見莫斯科充滿笑容
身為「遊俄KOL」，喺世盃期間自然收到唔少網民詢問，治安、暢錢、交通及必到景點都每事問。Caitly話：「幸好呢段時間莫斯科日照長，夜晚9點先收太陽，畀人治安較好感覺！另外本身俄羅斯人性格較Cool，不過今次無論去到邊度，都發現一班世盃義工都充滿笑容，顯示咗佢哋肯改變。」
Tommy娶俄女異地戀有收成
10年前因為網上聊天，結識咗俄羅斯女朋友、再拉埋天窗嘅華人Tommy，及後因愛女教育問題，3年前決定舉家搬到俄羅斯生活。Tommy坦言平日唔太留意足球，但受世盃熱潮感染而成為球迷：「起初大家包括傳媒唔太睇好俄羅斯，令呢度氣氛麻麻，但經過兩場贏波後，俄羅斯人嘅自豪感出晒嚟，令呢度嘅足球熱潮忽然加劇！」
入16強心滿意足
Tommy預測今晚俄羅斯會以3比1擊敗烏拉圭，但最終都會16強止步：「如果希望定得太高會變成奢望，能夠出線已經好滿足。除非好似當年南韓咁有『特別優待』，但現時有VAR，要出術都幾難！」
留學生主持網台大講世盃
3位喺莫斯科留學繼而落地生根嘅林川照、方飛及胡曄，現時為網上華語電台灰摩卡主持，用華語喺網上介紹俄羅斯生活點滴！林川照話今屆世盃有4萬3千張門票由中國人認購，故此製作咗唔少節目介紹遊俄注意事項，並大受歡迎：「好多中國球迷都想嚟睇球星，我哋都喺節目中加入世盃話題！雖然我哋唔算足球狂熱分子，但依家俄羅斯每個市民都講緊世盃，你唔識講就冇晒話題！」3人都希望俄國晉級後遇上西班牙，因為西班牙球迷夠晒熱情，屆時市況必定更為熱鬧。