10歲高栢齡夢想踢車路士

高栢齡受哥哥影響，早在1、2歲已對足球產生興趣：「因為哥哥有踢波，跟住踢下踢下覺得好得意，咁就喺屋企樓下啲足球場一齊踢波。」隨後，她在車路士足球學校（香港）學法，至今已7年。多年來，因足球緣故曾到訪多個國家，而對她而言，最深刻的一次經驗在日本：「有一次去沖繩比賽，對手大部分都係嚟自日本，得一支台灣球隊，本身我哋都係諗住去攞經驗，最後攞到冠軍都超級開心。」這次經驗使高栢齡獲益匪淺：「因為嗰度個球場好大，自己嘅體能、畀波都要做好啲。」與一眾隊友四出征戰，默契早已練成，其合拍程度更是「無聲勝有聲」：「因為同隊友都踢咗好幾年，大家好有默契，唔使出聲都知道邊個應該上、邊個應該落。」

獲獎無數功課繁重冇放棄

這些年來，高栢齡獲獎無數，而今屆的屈臣氏集團香港學生運動員獎，她亦榜上有名：「得到呢個獎我好開心，多謝校長同體育老師提名我，因為唔係次次都有，所以之後我喺踢波方面都會專心啲、做好啲，我要話畀人聽女仔同男仔都有得鬥！」雖然如此，但她仍謙稱：「自己本身鍾意進攻，但係我防守就差少少，所以有時教練都會叫我打右閘。」而今屆得獎的學生，更有機會前往泰國曼谷交流，「栢齡」冀增強膽量：「我上網睇到啲泰國人玩藤球好犀利，可以攞個膽出嚟凌空打倒掛，我都好想好似佢哋咁大膽！」

在球場上優異的演出，更為她帶來港隊席位，推動她繼續奮鬥：「好榮幸入到港隊，教練對我好好，港隊嘅訓練會嚴格啲，所以都要專心啲、認真啲。」眾所周知，香港學生功課繁重，「栢齡」亦無法避免，為了兼顧足球和學業，惟有做好時間管理：「我會喺學校做功課，剩低嗰啲返到屋企就快快手做埋佢。」夢想的旅途雖然疲累，但她從未想過放棄：「有時都會覺得辛苦，因為老師有時會畀多啲功課，又要踢波，都會有少少攰，但係從來都冇諗過放棄足球！」

圖／文：陳焌鏗