無家者借足球一嘗世盃夢！
「墨西哥城2018無家者世界盃」香港代表隊選拔賽昨於九龍城石鼓壟道球場舉行，激戰過後「含金量」最高的「街頭足球盃」由童軍知友社奪得，而越峰足球隊、Eagle FC、方舟足球隊則分獲「曙光盃」、「公義盃」及「仁愛盃」。發起人吳衞東希望藉着足球，讓無家者球員重拾自信迎接人生各樣挑戰，甚至可跟美斯及C朗等球星一樣，一嘗屬於他們的「世盃夢」！
昨日賽事為鼓勵參戰隊伍及球員，每隊均「有獎落袋」，活動發起人吳衞東「東哥」坦言獎項尚屬其次：「我哋期望球隊喺所屬嘅盃賽盡力而為，比賽同人生一樣，開頭可能唔順利，但去到後段你都唔好放棄，再嚟過。舉辦賽事唔係想球隊去攞第一，係希望佢哋喺自己領域入面重拾自信，全力迎接新挑戰，同埋學識堅持。」
發起人喜見球員進步
籌辦賽事、組織香港代表隊多年，「東哥」自言最深刻的是看見一眾球員進步：「唔單只係技術上，更重要係行為嘅進步，佢哋以往冇人生目標、甚至放棄自己，依家對自己多咗要求，仲建立到家嘅感覺，又有團隊精神、互相尊重，主動去鼓勵一啲球技冇咁好嘅隊友，去支援佢哋。對我嚟講，係好大嘅鼓舞！」
職業為社工的「東哥」，幫助露宿者已多年，對他而言，足球便是露宿者的「扶手」：「我本身服務咗露宿者已經18年，見到佢哋都有不良嗜好，能夠透過運動去改變，對佢哋同社會都係一個正面影響。希望透過足球幫佢哋重生同重拾自信，因為當佢哋跌倒，佢哋一定係放棄咗自己先會有呢啲不良嗜好。」
重投社會作出貢獻
除踢球以外，「東哥」還為「無家者」多走一步，助他們貢獻社會：「我哋會為佢哋提供職業培訓，鼓勵佢哋去考D級教練牌照，依家已經有球員做咗助教。除職業訓練，我哋亦有義工訓練，有啲球員去完外國比賽，會到中學做分享；另外亦有例子喺做咗社工，幫自己之餘更幫到其他人。」
圖、文：陳焌鏗