東方龍獅破百獵鷹聯賽兩連勝

飛鷹82:118東方龍獅
艾利諾（左）剷籃攞分予取予攜。

東方龍獅昨仗即使有隊長李琪因腳傷缺陣，但球隊在「戰神」艾利諾領軍下，眾球員發揮出色，上半場已經表現出贏波的決心。除了艾利諾外，吳松峻和鍾俊昇半場得分都上雙，完成首兩節東方龍獅領先57比44。雖然飛鷹有居港外援Aleksandar Stefanovski轟入5個三分球，但換邊後戰況仍然一面倒，終場「藍軍」全部上陣球員都有得分，兼且5位球員得分上雙，以「破百」118比82擊敗飛鷹，取得聯賽兩連勝。

重返香港籃壇1個月，吳松峻昨仗雖然拚至5犯離場，但個人攻入13分之餘，無論在助攻、傳球視野都有進步，原來李琪和艾利諾在練波不時給予「小貼士」:「他們會教我在傳球前要有一些小動作及傳波技巧，實在相當有用，期待我在今季有更多上陣時間，感受高強度的比賽去提升經驗。」

紅軍個犯纏身不敵遊協

至於尾場南華和遊協上演一場「至激大戰」，雖然首節初段南華曾經打出一段11比0的攻勢，但遊協站穩陣腳後有Eric Ferguson為球隊搶分，加上南華朱亮第二節中段已經受個犯纏身，令「紅軍」陷入危機，上半場只能領先5分。換邊後兩隊繼續鬥得激，朱亮在第3節初段已經4犯，遊協又有Scott Ewing連轟兩個三分球，為遊協追成52比52平手。

吳松峻（左）得分及助攻都有超水準。

遊協88:85南華 遊協的Eric Ferguson利用身高在籃下頻頻得分。

南華內線失去支柱，令遊協Eric Ferguson更加放膽爆入內線強攻，個人獨取36分，而南華亦有「奇兵」林凱光連追6分令比賽陷入拉鋸，結果雙方鬥到最後一刻，遊協終以88比85贏波，賽後遊協球員黃律堯表示：「希望一場比一場打得好，達成前4的目標，我們全隊上下一條心，大家不可再睇小遊協的實力。」