和富大埔變重生營 「囝囝」生性堅爸都讚醒!

港超聯球隊和富大埔今季由「堅爸」李志堅領軍,重召一個個自己帶大的「子弟兵」,組成「堅家軍2.0」殺入兩個盃賽決賽,聯賽暫排第3位。回帶一看,他們與季初目標愈來愈近,身兼球隊總監及主教練的李志堅雖滿意一班「囝囝」今季成績,但同時透露球隊上下仍有夢未圓!

「今年合格啦!其實各方面都滿意,以目標嚟講,我哋係做到嘅。」和富大埔季初曾揚言要成為「雙料冠軍」並劍指聯賽三甲,經一季努力球隊先後殺入菁英盃決賽、足總盃決賽、廝殺17輪聯賽後與香港飛馬同得34分,對方僅以較佳對賽成績排在第2位。「多謝球、職員百分百付出,今季成績全靠佢哋努力,球會好好無乜畀壓力我,自由度好大,始終唔係大球會,資源有限,全靠一班兄弟幫手!」

最想兄弟班踢亞協盃

球隊踢出成績固然值得高興,但一眾子弟生性才令「堅爸」最欣慰:「今年最開心係有啲以往跟過我嘅球員返咗嚟,或者一啲踢咗好耐嘅球員,今年喺呢度得到讚賞!一直都想話畀佢哋知唔好放棄,睇吓踢咗好多年嘅翟廷峯,一出道就紅,雖然之後唔係好多機會發揮,但今年係必然正選。」

「堅爸」繼續如數家珍:「大家一定覺得入波球員表現好,但無其他綠葉球員,絕對唔會有咁精彩嘅進攻出現。好似李瀚灝呢一年表現真係喜出望外,畀人笑『李三腳』到依家鬧佢嘅人都唔鬧。梁冠聰又係啦,返到嚟都有好表現。每一個畀人講到一文不值嘅球員,嚟到大埔都可以重新振作再出發,幫到佢哋證明自己價值係今季一個驚喜!」

本地賽事成績「有交代」,但「堅爸」並未滿足於此,反而把目標放得更遠,除了力爭衞冕菁英盃,更希望贏得足總盃取得亞協盃入場券。「亞協盃對我哋嚟講有雙重意義,球會當然想踢,對我哋兄弟班嚟講,呢個係夢寐以求嘅事。依家係佢哋足球生涯黃金時期,球員愈嚟愈成熟之後,一定遠走高飛,究竟仲有幾多人一齊完成呢件事呢?唔係佢哋唔想,係無人預知到,就算好似黃威、陳俊樂,我都唔知可唔可以同佢哋踢到亞協,一齊並肩作戰嘅『堅家軍』只會愈嚟愈少人,可能要到他日我有巨型班班費先搵到佢哋返嚟一齊打天下!」

主席續約 望到將來

對於來季展望,「堅爸」笑謂球隊已經不能走回頭路:「今年已經坐3望2,下年惟有挑戰聯賽冠軍啦,呢個係目標嚟!目標只有愈嚟愈高,始終要同球會、球迷交代,冇得行番轉頭!哈哈!」儘管球季未完但「綠戰士」已迎來好消息:「我哋蔡主席已經同球隊續約兩年!一隊波最希望見到將來,嚟緊我哋起碼有兩年時間可以投放更多心機落去,希望喺各方面做得更好!」

本周賽程

中銀人壽香港超級聯賽

5月13日(日)

冠忠南區 Vs 東方龍獅

香港仔運動場

下午2時30分

$80、$30(特惠票)

和富大埔 Vs 香港飛馬

大埔運動場

下午2時30分

$80、$30(特惠票)

標準流浪 Vs 夢想FC

深水埗運動場

下午2時30分

$80、$30(特惠票)

理文 Vs R&F富力

將軍澳運動場

下午2時30分

$80、$30(特惠票)

傑志 Vs 陽光元朗

旺角大球場

下午2時30分

$150、$50(特惠票)

文:胡恩晴

圖:何彥霆