朱志光總結︰場場有進步
傑志昨晚到訪南韓全州世界盃體育場，出戰亞冠盃E組最後一輪分組賽鬥全北汽車，上半場「藍鳥」與這支去季韓職冠軍互有攻守，惟下半場全北換入的李承琪、金信煜及林善永各入1球，終以3比0贏波，今屆傑志亞冠之旅亦告一段落。
賽前已經篤定晉級的全北，甫開賽便不乏攻勢，卡路士阿祖安奴於開賽5分鐘頭槌攻門僅告斜出，其後全北巴西外援泰亞高艾維斯兩度埋門亦無功而還。另邊廂傑志首個具威脅的攻門則出現於27分鐘，鄭展龍接應費蘭度妙傳於禁區內起腳，但被宋範根救出。傑志隨後39分鐘有盧均宜接應王振鵬長傳起腳，惟未能命中目標，結果上半場在傑志門將王振鵬「左飛右撲」下，雙方互無紀錄完上半場。
全北首名 16強鬥武里南聯
下半場全北作出調動，63分鐘起先後換入林善永、金信煜及李承琪，結果於72分鐘，李承琪即為主隊打破僵局，79分鐘再由金信煜拉開至2比0，到87分鐘由林善永埋齋，最終全北以3比0擊敗傑志取得首名資格，16強將面對泰國球隊武里南聯。
賽後傑志主教練朱志光總結球隊於今屆亞冠盃的表現，認為由最初出戰賽事至今，已經不斷在進步：「傑志首次踢亞冠分組賽，開始嘅時候打得唔順，因為球員適應唔到比賽，經過咗兩場之後，我哋一場比一場進步，包括埋今場，雖然面對住韓職冠軍，佢哋擁有好好嘅陣容同好強嘅能力，進攻同防守都好好，但係我哋打落去都唔係一面倒，我哋都製造咗好多攻勢。」
朱Sir續說：「經過呢屆分組賽，我哋已揣摩到亞冠水平係去到邊度。始終傑志嚟緊都希望繼續挑戰亞冠嘅舞台，我可以保證將來如果我哋再有機會打亞冠，一定會打得更好，人腳方面可能再強啲！」
何彥霆南韓直擊