和富大埔東方龍獅搏甩髀
「中銀人壽香港超級聯賽」復活節最後一擊，聯賽榜「3哥」和富大埔今午於主場大埔運動場迎戰「4哥」東方龍獅，賽前雙方季內兩次交手，均由和富大埔勝出。現時雙方只有3分差距，東方龍獅爭入前3今仗許勝不許敗，料兩軍勢演一場激戰，未能到場的球迷，請留意東網直播。（東網on.cc周一下午2時30分直播）
和富大埔近況一般，近3場比賽只錄得2和1負，主教練李志堅期望憑主場之利及時反彈：「大埔主場有啲着數嘅，始終個場地我哋熟習啲，呢方面會有優勢。」上兩仗都是先開紀錄的一隊，惟最終仍被對手搶分成功，「堅Sir」認為球隊要加強集中力。
「堅Sir」：加強集中忌再大意
「堅Sir」說：「我覺得球隊太輕率，當贏緊波、或者進攻緊，成日都畀人哋打反擊。好多時都係自己大意犯錯，所以大家要再集中啲。」經歷國際賽期後，和富大埔傷兵問題已經獲得紓緩，據「堅Sir」透露，該隊目前只有呂志興仍未能比賽，其他戰將均可候命。
狀態極佳的東方龍獅，近4場賽事取得3勝1和兼零失球，主帥李健和形容球隊沒有失分空間：「大埔成季表現都好穩定，我哋冇好刻意集中喺呢場波，由我接手嗰陣，我就同佢哋講餘下賽事場場都重要，我哋喺分數上落後得多，每個球員、職員都要對球會有交代，冇失分空間。」
今仗作客大埔，「和哥」稱會因應場地調整戰術：「大埔運動場草地質素唔理想，唔夠平坦亦都比較硬，當然有啲擔心。不過我哋都要視乎情況作出應對，可能放好多長波都唔出奇，要睇到時戰情變化。」隊中除中場沙巴、左閘張健峰養傷未能上陣外，部分球員包括葉鴻輝、徐德帥、鞠盈智、梁振邦、黃梓浩及麥基等上周隨港隊遠征北韓，「和哥」表示不擔心球員體力恢復問題，相信屆時可落場。
何彥霆報道