復出即被麥基責傷左膝 咖喱仔當堂灰咗！
「咖喱仔」史堤芬居里傷完又傷！雖然勇士喺NBA常規賽主場一度落後15分之下，後上以106比94反勝鷹隊，不過今仗攻入29分嘅「咖喱仔」於第3節畀出名「論盡」嘅隊友麥基壓傷，被迫退下火線，搞到勇士贏波後都唔多Happy！
因為右腳足踝受傷，已經缺陣6場嘅史堤芬居里重新上陣，開局手感雖然麻麻，但其後愈射愈有，打到第3節已交出29分及7個籃板，點知打到着火之際，慘被封阻對手後企唔穩嘅隊友麥基責傷，初步診斷係左膝內側副韌帶受傷，需要進一步接受磁力共振檢查了解傷勢。由於勇士另外3位主將杜蘭特、奇利湯臣同積蒙格連仍未傷愈，依家「咖喱仔」再次加入傷兵名單，意味勇士暫時又要喺「4巨頭」缺陣下作戰，加上咖喱仔受傷後表情灰到世界末日咁，令人擔心佢短時間內好難復出。
教練卡爾賽後同愛將傾過，坦言感受到「咖喱仔」對於再次受傷有多失望，隊友歷克楊格亦話：「臨近季後賽出現傷兵潮實在沮喪，只能祝福隊友盡快康復。」
李安納拒絕馬刺復出要求
受傷對球員嚟講的確係重大打擊，除勇士「4巨頭」之外，馬刺球星李安納亦深受其害，自季初一直缺陣至今，日前更傳出呢位全能球員拒絕馬刺提出盡快復出嘅要求。馬刺昨日加時以124比120擊敗到訪嘅爵士後，「法國跑車」柏加對事件作出回應：「我之前四頭肌受傷接受8個月嘅治療，李安納傷勢比我輕微100倍，若果信唔過馬刺隊醫，不如去歐洲接受治療啦！」