肥榮愷樺單車路上小確幸
「好多身邊嘅朋友同內地教練都話，做咩害你阿妹，你自己成日嗌踩單車辛苦，仲推佢入嚟？但我覺得當你捱得過單車隊嘅生活，未來做乜都好，都唔會捱唔過。」梁峻榮、梁愷樺是香港單車隊其中一對兄妹檔，受訪期間梁峻榮「肥榮」雖經常「取笑」妹妹踩得慢，然而不難察覺兩人兄妹情深。踏上全職單車手之路非常辛苦，偏偏「肥榮」認為阿妹可從中學到更多，加上有家人在身邊互相鼓勵，一起為理想奮鬥、分擔痛苦，相信是作為全職運動員的「小確幸」(微小而確實的幸福)！
一句鼓勵成愷樺奮鬥動力
6年前正式成為全職運動員，梁峻榮當初曾憧憬與妹妹一起在港隊奮鬥：「當時成日喺度計，如果阿妹上全職我會幾多歲？以前覺得好遙遠，但依家阿妹已經第2年全職，當時冇諗過逼佢行呢條路，但又好想佢入嚟一齊奮鬥。」到了今天，「肥榮」看阿妹比賽仍會萬分肉緊，更搞笑稱「想踩埋佢嗰份」。對此梁愷樺依舊笑一笑，因為她一直記得，2015年首次出戰亞青賽時哥哥給她的鼓勵：「當日第一個項目記分賽踩第3，踩完我已經喊緊，阿哥踩過嚟同我講踩得好好。」一句說話勝過千言萬語，亦成為「愷樺」奮鬥的動力。
「肥榮」去年勇奪全運男子全能賽金牌，在頒獎台上擁抱阿妹並流下男兒淚，與幾年前的場景一樣，只是角色互換，由阿妹安慰哥哥，兄妹情表露無遺。親眼見證哥哥摘金，「愷樺」同樣驕傲：「我睇到阿哥喺訓練上畀咗幾多心機，佢喺全運會攞金牌，對我嚟講係好大鼓舞，會想踩得更快，唔想令阿哥失望。 」
肥榮望阿妹征戰亞運
「做運動員呢條路唔容易行，但學到嘅一定比出面社會多，未來面對困難，只要你諗番起自己點樣捱過昆明嘅生活，唔會再有嘢難到你。」愛妹深切的「肥榮」，在「愷樺」決定踏上全職運動員這條路後，初時給阿妹施加許多壓力，但隨着經驗的累積，他逐漸知道阿妹在單車路上會有自己的發展方向，但仍為她訂下一個目標：「希望細妹喺今年雅加達亞運有機會代表港隊！」兩兄妹在港隊互相扶持，再大的困難亦有人分擔，即使前路如何不平坦，「梁氏兄妹」亦決心攜手跨越！
2018新鴻基香港國際場地盃
日期：3月31日至4月1日
地點：將軍澳香港單車館
門票：$50（單日標準票）、$30（單日學生及長者）
詳情可瀏灠www.cycling.org.hk或致電60317655
圖／文：王藝霖（部分相片由受訪者提供）