CP3惹火險開拖火箭一放到尾擒木狼
火箭昨於NBA常規賽作客以129比120擊敗木狼，占士夏登取得34分，帶領火箭完成5連勝，而且夏登喺上半場已經有15分同10次助攻，協助球隊首兩節已經瘋狂攻入77分，就算木狼嘅教練泰保杜被稱為聯盟防守專家，依然被輕易摧毀！
近期信心爆棚嘅火箭喺第1節已拉開比數，最後占士夏登有34分、4個籃板同12次助攻，基斯保羅有18分、8個籃板同9次助攻，帶領火箭連贏5場，夏登除於上半場交出15分同10次助攻，完場前1分鐘更射入招牌「後撤3分球」，繼續有MVP級別表現。
保持專注 夏登開心
另一方面，木狼大前鋒唐斯交出20分及18個籃板亮麗數據，帶領木狼從最多落後25分的劣勢下，於第4節一度收窄至5分差距，可惜最終未能成功翻盤，阻不了木狼落得2連敗下場。比賽尾段亦出現小插曲，基斯保羅同木狼球員迪安爭波，球證吹停後「CP3」並冇收手，幾乎同對方打大交，結果連累為他出頭的火箭新星謝勒格連，被吹判第2次技術犯規被逐，不過火箭球員對比賽的投入感，反而得到球迷「派Like」，夏登賽後指出：「我哋唔容許遙遙領先之下輸波，球員場上每刻都要保持專注，今場大家都做到，對我哋嚟講今場係好好嘅經驗。」