吳安儀捧盃勝在冇壓力
香港桌球天后吳安儀日前奪得在馬爾他舉行的女子桌球世界錦標賽冠軍，昨午返抵香港時心情仍然興奮，直言今次以世界一姐身份衞冕感到意外：「今次帶着新排名出賽，其實已經有壓力，加上一到埗馬爾他已經出現流鼻水、喉嚨痛情況，幸好教練立即帶我睇醫生，所以頭兩日未比賽我都一直休息、食藥，都唔會對自己期望太高，甚至有諗過好早就出局……可能冇期望，壓力反而少咗，之後每場愈打愈好，信心又大咗，決賽勝出一刻自己都喊咗出嚟，因為真係冇諗過可以衞冕。」
吳安儀表示，今次成功衞冕關鍵在於抗壓能力明顯提升，加上4強戰先贏4比0，有更多時間休息，決賽對手只得15分鐘休息就要打決賽。「勝出準決賽後，教練叫我熄咗電話先，怕太多朋友恭喜我會令我分心，所以我係比賽之後先同爸爸視像電話。上年決賽我打足15小時，冇諗過今年可以咁順利，球迷都唔使捱眼瞓等咁耐，哈哈！」
享受心態出戰男子組賽事
下月將以外卡身份出戰男子世錦賽外圍賽，「四眼Cue后」強調今次將會放鬆心情出戰：「之前兩次表現唔好，因為第一次太緊張唔適應氣氛，第2次就因為準備咗一整年想打好啲，但可能對自己期望太大，又令自己發揮得唔好，所以今次唔會再諗咁多，好似今次咁享受比賽就得！」