傑志4強遇夢想FC
本屆菁英盃經過昨日分組煞科戰後，4強誕生！B組傑志於頭場的「入球騷」3比2力克標準流浪，傑志勝後壓過香港飛馬獲小組首名出線，4強遇上夢想FC；A組煞科戰更激，賽前篤定獲首名的和富大埔，3比3賽和有史提芬彭利拿連中三元的理文，和富大埔將硬撼香港飛馬爭奪決賽席位！
傑志昨仗開賽僅2分鐘即取得領先，林恩許右路推大位起腳，皮球直飛遠柱死角先開紀錄，這位功臣15分鐘再下一城，接應林嘉緯傳中頂成2比0，個人梅開二度。標準流浪站穩陣腳後搶回不少優勢，29分鐘憑黎洛賢右路斬中，劉智樂衝頂破網追成1比2。38分鐘到佐佐木周近門射斜，標準流浪未能扳平之餘，更被傑志再度拉開，華杜斯於41分鐘近門射成3比1完半場。
易邊後標準流浪積極反撲，60分鐘獲得12碼，佐佐木周操刀得手追至2比3，1分鐘後流浪再獲良機，惟卡拉錫狂抽被郭劍橋撲出底線。急於追平的流浪之後多番遠射，但統統被演出可人的郭劍橋所瓦解。最終傑志保住3比2勝局，全取3分後以10分趕過香港飛馬，以首名出線，4強面對A組次名夢想FC。
朱Sir：多線作戰都夠人腳
標準流浪教練蘇洋賽後稱：「開賽有啲唔集中，經過一段時間先進入狀態，球員嘅拚搏精神幾好。」力戰下惜負，蘇洋讚揚球隊進攻有改善：「之前我哋冇咩波入，但近幾場進攻方面做得幾好，入番唔少波，依家要喺防守落苦功，希望減少失球。」傑志主教練朱志光表示：「年輕球員較少落場略為緊張，有部分球員因贏輸都出到線，加上早入波所以放鬆咗。」「藍鳥」要多線作戰，朱Sir續指：「人腳上都夠，不過唔想辛苦晒一兩個人，我嗰日都有問華杜斯攰唔攰，佢話唔攰，仲話多啲比賽好過練波。」