曾昭達雙重身份雙重興奮

港超最年輕主帥曾昭達「達Sir」,擔任陽光元朗主教練的他,其實還有另一個身分,也就是一位……教練。定少少,不是「玩嘢」!所指的是「達Sir」除執教陽光元朗之外,才28歲的他亦是香港大學足球代表隊的教練。

球員出身的曾昭達,2016年在元朗完成職業球員生涯最後一個球季後,便接替馮凱文執起該地區球隊的教鞭。與此同時,在恩師陳曉明的引薦下,接掌了HKU校隊的帥印。「眨眼原來已經係年半前嘅事,我自細就好鍾意挑戰自己,成日會訂立一啲目標畀自己去完成。教元朗之前,我喺中學學界帶過隊,亦教過女子隊,帶大學球隊可以話係另一個層次,情況就同我當日決定掛靴去帶職業隊一樣。」「達Sir」回憶道。

雖然同樣是教練,但此「教練」和彼「教練」卻大有分別,「達Sir」解釋,身為HKU的教練,除着重球員的技術和球隊戰術之外,還要關顧許多足球以外的範疇,例如球員的心理、作息、紀律和成長等等。「同樣工作元朗都會有,但因為球員本身有一定技術水平,好多球員好波過我,所以會集中多啲戰術部署。仲要參與管理、安排同協調工作,性質好唔同。」「達Sir」表示。

令球員成長最大成就

在兩個「教練」的角色上,怎樣界定自己成功與否?「達Sir」說:「都有好大分別,教元朗我最想畀到球員合適發揮平台,特別係一啲肯付出嘅球員,等佢哋可以發光發熱,出到名、攞到獎,甚至畀大球會撬走;至於教港大,發掘到有潛質球員固然好,但如果可以令球員成長,於社交、待人接物、生活細節都有改進,都係好大成就!」

談到得着,一向「吹得」的「達Sir」,更說到眉飛色舞:「教元朗呢年半,我好開心有一班目標一致,好簡單嘅『兄弟』可以一齊奮鬥;部署成功同見證球員成長,滿足感好大。至於教港大呢年半,同樣非常開心,因為見到一班『囝囝』不斷成長,又保持到對足球嘅熱誠同決心,單純咁去追求踢波樂趣,一切都係珍貴嘅收穫。」

自我提升惠及眾人

畢業於城大會計系的「達Sir」,雖然道出了兩個「教練」很多不同之處,但其實亦有共同點,就是本身都要不斷求進,不能原地踏步:「我唔鍾意停留於一個層面太耐、太安逸就會失去動力,所以我上年已經去讀A牌,希望自己可以不斷提升層次,自己有益自然對球員有幫助。身為教練可以Upgrade到,咁對元朗或者港大球員都係好事呀!係唔係?」

圖/文:戴陶蔚(部分相片由受訪者提供)