堅Sir茶記統戰子弟兵
港超聯地區球隊之一的和富大埔有其獨特魅力，每有比賽都不難見到一班「大埔人」為球隊打氣，能有如此凝聚力，除了因這支奇兵上季成績斐然，令球迷另眼相看，更因由李志堅「堅Sir」率領的大埔軍團日日「落區」，以區內「茶記」為球隊統戰部！
李志堅「堅Sir」去季領一眾子弟兵勇奪菁英盃，今季更與自己一手湊大的梁冠聰、袁振昇等「堅家軍」重逢。球隊陣容有變，不變的是練習後一起吃飯的傳統：「講真除非本身friend，如果唔係好少特登約出街。練完波一齊食飯，等大家多啲時間一齊，關係就係咁建立番嚟。之前練波有咩唔開心，傾兩句就無事，唔會放喺心。」
平日一時許總會見到他們一行數十人，練習後浩浩蕩蕩步行到附近餐廳午膳。位於大埔墟的東興茶餐廳，更成為他們「統戰」基地：「呢度我哋成日嚟，最鍾意呢度多選擇、又平又抵食！坐到好多人，幾個教練坐埋又可以講下場波。通常都係揀呢間，如果有人請食飯先會去另一間西餐廳，同埋外援都會有多啲選擇，不過我哋啲外援好犀利，嚟呢到都識叫幾款飯食！」
球員教練團都有地區元素
「堅Sir」過往曾帶領不同球隊，但原來早與大埔這地方結下不解緣：「自己本身住喺大埔廿幾年，當年青幼苗足總派我負責大埔嘅工作，嗰時就識咗李嘉耀、袁振昇呢班人。」除了一班「子弟兵」，李志堅的教練團隊也有「大埔元素」︰「阿智（陳旭智）同興仔（呂志興），佢哋喺大埔好多年，對所有嘢都好熟悉，佢哋比同齡嘅人早熟、好有擔帶，佢哋做嘢我完全放心！加上大埔係佢哋屋企，區入面嘅事佢哋仲熟過我，好多嘢都跟得好上心。」
與教練團合作踏入第二季，「堅Sir」句句有讚無彈，全因現時的陣容最舒服：「大家合作得好好、好融洽。呢度真係教過咁多隊最舒服，球隊上下都好團結，無咩勾心鬥角嘅事情，始終同一個鼻窿抖氣，大家會一致啲。呢度大家有咩都可以畀意見，連放假都有得傾，好似嚟緊聖誕節，知道一班外援好重視呢個節日，同大家商量之後，決定放吓假，畀大家去旅行、輕鬆吓。」
．未來賽程．
12月24日（日）
高級組銀牌4強
傑志 Vs 陽光元朗
旺角大球場
下午3時
$80、$30（特惠票）
12月25日（一）
高級組銀牌4強
冠忠南區 Vs 東方龍獅
旺角大球場
下午3時
$80、$30（特惠票）
12月28（四）
中銀人壽香港超級聯賽
東方龍獅 Vs 夢想FC
旺角大球場
晚上8時
$80、$30（特惠票）
文、圖︰胡恩晴