羅拔臣連追5局大逆轉 捧盃壓力玩謝曹宇鵬
昨舉行的蘇格蘭公開賽決賽超戲劇性，中國27歲球手曹宇鵬出道6年首闖排名賽決賽，面對「墨爾本機器」羅拔臣一直領前，於17局9勝賽制下，一度領先8比4手握5個決勝局，但之後兵敗如山倒，畀羅拔臣連取5局後來居上反勝，同首個拉排名賽錦標擦身而過。於第16局，曹宇鵬只要Cut入黑波就奪冠，但他卻因壓力太大未能打入，難怪他於失冠後搖頭嘆息，不斷說自己唔夠好。
曹宇鵬於今項大賽表現一流，曾打出147度最高度數，準決賽又擊敗「準神」卓林普，決賽遇上已經有年半未贏過排名賽冠軍的羅拔臣，開局氣勢如虹，曾打過1Cue82、72及60度，領先羅拔臣3比1。雖然羅拔臣扳回一局，但又畀曹宇鵬甩開到5比2，及後羅拔臣冇晒符，落後到4比8。
打失奠勝「黑柴」最關鍵
「只要贏多局就成為冠軍」給予曹宇鵬無比壓力，之後瘋狂失準，結果輸吓一局輸吓又一局，被表現都有失誤的羅拔臣追到7比8。去到關鍵第16局，羅拔臣留低Pink波於袋口，曹宇鵬順利打入，點知白波位置欠佳之下，Cut黑波失誤留袋口益咗羅拔臣，雙方要打決勝局分勝負。曹宇鵬於決勝局雖然兩次「埋枱」，但始終受不了壓力發揮不出水準，最後羅拔臣再下一城，完成大逆轉奪標。
賽後羅拔臣即時走到曹宇鵬身邊作出鼓勵，曹宇鵬就擰晒頭顯得勁失望，自責心理質素唔夠強，畀壓力玩死，但會好好記住呢次教訓，更向球迷承諾下次會做得更好！