陽光元朗最愛冰室人情味
元朗貴為新界「美食天堂」，不少人假日特意慕名而來「潮聖」，上至中西餐、下至街邊小吃，全都是「高質」、「顏值高」、可以放上社交平台「呃like」的美食。原本以為扎根於當地的陽光元朗，定會推介某家的涼粉，誰知縱然身邊美食芸芸，元朗球隊上下卻鍾情於他們平常練習球場旁的勵揚冰室。
醫肚隨便講波經冇人趕
「勵揚冰室係我哋飯堂！」元朗主帥曾昭達「達Sir」於天業路球場訓練完，帶着一行15人的元朗大軍浩浩蕩蕩走到天一商城的勵揚冰室。「我哋成日練完波都過嚟食飯，可以話係我哋聚腳點！一來近球場，大家練完波行過嚟就可以『醫肚』。最鍾意呢到地方大，我哋咁大棚人嚟食飯，好少餐廳容納到咁多人。」
除了地方夠寬敞，「達Sir」更喜歡這裏的人情味：「成日喺呢度食飯，同老闆甚至招呼我哋嘅侍應姐姐關係都幾好，我哋坐好耐講下場波、講下戰術，老闆都唔會趕我哋！而且呢度啲飯永遠都好大碗，大家都知做完運動胃口會好啲，唔夠食仲會為我哋添飯！」
不單只冰室有人情味，「達Sir」表示整個社區亦如是：「元朗、天水圍社區比較細，大家關係好好，街坊撞口撞面都知我哋係球員。你試下同法比奧行一轉，行200米真係街頭到街尾都識佢；其次係葉子俊，好多街坊都認得佢哋。」
達Sir當正球員係家人
本為球員的「達Sir」上季一轉角色領軍征戰，成為最年輕主帥。比起兄弟，「達Sir」表示球隊更像家人：「我哋唔係『兄弟班』，係屋企人！講真見佢哋多過見自己屋企人，年幾以嚟球隊氣氛唔錯、好融洽，始終我由球員變教練，同佢哋年紀又差唔多，傾得埋又玩得埋，大家關係好密切。」
說到與「這家人」最深刻的回憶，「達Sir」堅定的說：「高級組銀牌8強戰反勝和富大埔暫時係最難忘！各方面嚟睇我哋未必係優勝嘅一方，但係每個球員都好肯搏，最終贏到場波！每一次見佢吔落場真係幫我搏緊命，見到呢個情況我已經好開心！」
圖/文：胡恩晴
場地提供：勵揚冰室