夢想FC標準流浪引爆青春火花
「中銀人壽香港超級聯賽」今日上演2場賽事，其中同樣重用年輕球員的夢想FC和標準流浪，會於下午2時30分假青衣運動場對壘。夢想FC上場作客廣州燕子崗不敵R&F富力，然而整體發揮出色，加上主場出擊屢有佳作，勢必傾力博反彈；至於標準流浪剛戰作客踢出代表作，打破香港飛馬不敗身，狀態大勇。今仗兩隊碰頭，引爆青春火花！（東網on.cc周日下午2時30分直播）
儘管去仗作客全失3分，連勝走勢斷纜，但夢想FC主帥「細榮」梁志榮，認為球隊表現絕不亞於對手，他說：「球證執法嗰啲唔講喇，講嚟都嘥氣！淨睇球員嘅表現其實真係唔曳，特別係幾個後生嘅，都踢得好好，戰果雖然唔理想，但係見到班球員畀晒出嚟，做教練嘅好安慰啦！喺場波入邊，對年輕球員嚟講係有得着嘅，對佢哋嘅成長肯定有幫助。」
梁志榮提防「阿國」「BB」
被問可會點名稱讚旗下年輕球員，向來「直腸直肚」的「細榮」答道：「自己隊波唔講啦！反而呢場對手陣中有幾個年輕球員都要留意，好似『阿國』（即卓耀國）、『BB』（即黎洛賢）同『楓仔』（即廖培楓）都係好有潛質嘅後生仔，各有各專長，踢埋同一隊產生到唔錯嘅化學效果，不過我都有信心可以喺主場贏波嘅。」夢想FC聯賽主場先後逼和和富大埔1比1，以及4比2擊敗冠忠南區，主場威力不言而喻。
標準流浪方面，去仗梅開二度的卓耀國表示，球隊贏得十分重要的勝仗，由於是開齋波，相信能提升隊員信心：「今場對夢想FC相信會鬥得好激烈，兩邊都有好多年輕球員，近況大家都差唔多，料會合演一場勢均力敵嘅賽事，希望多啲球迷入場或者睇直播支持我哋。」標準流浪今仗有後防主力徐宏傑停賽，其右閘位置預計會由「通天老倌」楊賜麟頂替。