GT盃12戰車串燒5,000萬報銷
澳門大賽車進入戲肉，炒車場面極震撼，其中國際汽聯GT世界盃選拔賽，首圈出現群車疊炒連環串燒意外，受影響戰車多達12架，比賽重開後僅8架車完成賽事，包括香港唯一車手歐陽若曦及其保時捷檸茶戰車，Darryl在選拔賽得第6名，冠軍落在莫他拿手上，兼獲今日正賽頭位資格。
起跑後第一個圈，50號車真卡迪拿於摩囉園彎撞牆停低，衞冕的雲科爾收掣不及撞到車尾，由於屬轉彎盲眼位，後面10多部戰車全部煞唔切車，炒埋一碟。巴西車手迪加拉斯駕駛的11號Audi更飛上其他車上面，場面誇張。由於參戰GT盃全部都是超級跑車，咁樣一撞就無咗近5,000萬港元，真係睇到心痛，今次意外前面4架跑車走得甩，而後邊亦有4部戰車冇事，包括駕駛檸茶戰車的歐陽若曦。
預測有雨添變數
其實檸茶戰車在今次意外都撞爛車頭，水箱全毀，尚幸戰車能在缺水之下駛返維修站，才可繼續比賽。對於今次意外，歐陽若曦形容是「一個人犯錯累及整個賽事」，並坦言自己有點好彩，但都要夠醒目先得，他說：「由16追上第6，我當然不希望以這種方式達到，不過現實若非發生意外，自己很難有機會提升名次，現在進佔第6，周日正式賽事會以闖入三甲為目標。」
受意外影響，戰車要臨時更換水箱，車速無法提升，Darryl表示：「工作人員將會搶修戰車，提升速度，希望能以最佳狀態比賽，天氣預測周日有雨，亦會令賽事增添變數，最重要是避過意外，因為在澳門比賽不容失誤，隨時一炒車就玩完。」