馮奇理直氣壯唔怕炒！

曾為港隊代表、加上於英國華威大學工商管理碩士學位，「馮奇」球員年代已相當出位，退役後更獲薦成為當時英超球隊伯明翰的財務總監，風頭一時無兩！直到去年夏天，「馮奇」決定返港出任理文流浪CEO，再在今個球季成為自立門戶的理文CEO兼領隊，他直言一切只為回饋香港球壇：「歐洲波比香港波搞得好。我就係想將喺英超經歷過嘅先進嘢，帶返嚟香港，令球壇進步！」

提出問題 令大眾注視

不過也有球圈人士批評「馮奇」開口埋口都是「英超」，規模相隔十萬八千里，難免有「離地CEO」感覺，「馮奇」為此平反：「我都知有距離，就係想將距離拉近！有人質疑外國果套唔啱香港，但其實我都係喺呢個圈子長大，亦都經歷過資源緊絀時期，梗係知道有咩係可行、有咩唔可行，所以經已按實際情況調整過。如果你執意合埋眼話乜都做唔到，咁咪做唔到囉！」早前「馮奇」就與圈內人士因球員薪酬待遇起罵戰，但他直言不介意為此而樹敵，因為就是有人把實際情況「心口掛着勇」地說出來，才能令大眾注視問題。「馮奇」更強調一向都是「泥水佬造門」：過得自己過得人！

兼任領隊最緊要冇顧慮

今個球季「CEO馮奇」更兼任領隊一職，他直言要「唔怕炒」先可做得好：「其實領隊係最『孭鑊』位，每次成績唔好都係炒領隊而唔係炒球員。依家教練團有殿堂級嘅平哥（陳鴻平）、林Sir（林慶麟）、又有馮Sir（2013年最佳教練馮凱文），經驗一定好過我，但佢哋個個有大有細，得我唔怕炒，惟有出嚟頂埋，同老闆講球隊成績唔好就由我孭，咁佢哋先可以無壓力下各司其職！」

要在球圈樹敵做醜人、隊內又做「孭鑊男」，但「馮奇」樂得自在：「天將降大任於斯人，必先勞其筋骨！一個人去得多地方，眼界就會擴闊，胸懷都會大啲，唔使理啲小事，知道自己堅持嘅方向就夠！」果然是「球壇黎明」，金句需要些時間消化！

圖/文：司徒子文