銀牌8強戰打孖嚟

冠忠南區乘勝撼理文

上仗於主場以3比0大勝陽光元朗的冠忠南區，主帥鄭兆聰（Ricky）賽後指球隊仍有進步空間：「贏波當然開心，不過可以再踢好啲，但有時球賽嘅預計同發揮，唔會百分百完美。我覺得我哋對夢想係踢得好，但就畀人哋入咗4球，而呢場波我哋防守上有改善，令我哋放心去攻。」對於久休復出的陳文輝正選披甲，「Ricky」亦勉勵他繼續努力：「『文輝』要繼續爭取表現，無論喺狀態同體能上都要提升，球隊陣中可以用波嘅有佢同陸志豪，未來都靠佢哋兩個負責分波。」

馮嘉奇：今場波好均勢

在銀牌首圈以2比1擊敗R＆F富力進身8強的理文，球隊上周因颱風卡努襲港，聯賽對香港飛馬因而取消，球隊要等待3周才有賽事，領隊馮嘉奇則對互射12碼比較着緊：「颱風令到球隊操練有啲亂，但影響唔算大，我對球員好有信心。今場波兩隊好均勢，雙方都希望入4強，應該會踢出一場高速賽事，可能會考驗球員嘅耐性。我哋每逢踢親銀牌都會練定射12碼，因為球隊平時好少就12碼作綵排。」

東方龍獅再鬥香港飛馬

同樣因賽事延期而令球隊缺戰3周的東方龍獅，8強對手正是上仗於聯賽碰頭的香港飛馬，東方目前除李康廉長期受傷及曾至孝十字韌帶撕裂需要做手術外，近期亦有洛迪古斯、沙巴及勞高等人受傷。主教練司徒文俊指上輪對夢想FC一仗延期對球隊有利，令一眾傷兵有更多時間恢復，期望球隊可修正過來，在建立信心之餘，亦要針對之前幾場敗仗所面對的問題作出改善，讓球隊重返正軌。

理文門將 陸平中	東方龍獅後衞 黃梓浩	香港飛馬前鋒 伊高

楊正光：做好準備迎硬仗

目前在聯賽保持不敗的香港飛馬，為保持狀態上周二與All Black FC友賽，並憑艾華的入球以1比0小勝對手，而球隊亦有在操練中練習12碼，主帥楊正光指已作出最好準備：「季前曾定下目標，希望喺盃賽奪冠，條路仲係好漫長，今場對東方絕對係硬仗，佢哋目前喺聯賽唔太理想，相信想喺盃賽爭取成績。盃賽任何嘢都有機會發生，所以要有充足嘅準備。安排友賽係等球員可以保持狀態，所以都確保球員喺友賽嘅上陣時間比較平均。

今日賽程

高級組銀牌8強

冠忠南區Vs理文

將軍澳運動場 下午2時30分

$80、$30(特惠票)

東方龍獅Vs香港飛馬

旺角大球場 下午5時30分

$80、$30(特惠票)