甘做「細榮」背後男人CEO梁智駒湊大夢想FC
CEO，Chief Executive Officer，即是行政總裁。在香港球圈中的CEO，除了足總的薛基輔和理文的馮嘉奇外還有一個，就是今季新軍夢想FC的梁智駒。大部分人心目中的CEO都是位高權重，一人（班主）之下，萬人（其他職球員）之上，但「阿駒」個人則對自己的職銜有另一種睇法：「出糧嗰個就真係位高權重喇，我都係受薪嘅，同球隊上下無分別，職銜嘅嘢名嚟嘅啫。而且各有各職責，有事我會行出嚟，無事就企埋一邊，總之對件事、對球隊好就得！」
自2009年正式掛靴後，昔日港甲「9碼射手」梁智駒，終於在今季回歸香港球圈，出任港超新軍夢想FC的CEO。由於球隊新埋班，「阿駒」坦言要處理的事情遠超預期，但慶幸「兄弟多」得到各方友好出手相助，他說：「由搞個會籍開始，到埋班斟球員、搵外援、借球員，到建立教練團，幾乎所有嘢都係由零開始。初頭都有啲擔心，但好彩我冇嘢多係朋友多，喺大家高抬貴手下，2個月嘅時間，所有嘢都喺最後搞掂晒，真係多謝幫過我嘅每一位朋友。」
「外援買日用品都要湊」
問及在夢想FC的工作，是否一如外界傳聞「梁智駒位高權重，唔使點做」，本來談得興高采烈的「阿駒」，不禁眉頭一皺。「邊個講呀？球隊入邊唔同崗位有唔同職能，我做咩？我咪係『湊仔公』囉！隊中好多年輕球員，有得踢、冇得踢要湊，踢得好、踢得曳要湊，一時要氹、一時要鬧，就連外援球員都要湊，安排佢哋租屋、睇醫生、買日常生活用品，就連搭車都要湊！CEO做乜？咪就係湊仔囉！湊仔會唔會唔使點做呀？」平日操練前後，總會把握機會跟隊中年輕球員和外援溝通的「阿駒」表示。
「阿駒」之前曾在英超球隊伯明翰工作，計眼光、論資歷，在夢想FC可謂數一數二，加上身為CEO，會否插手球隊教練團的工作？「之前我喺《專欄輪住嚟》都講過，能夠同『細榮』（即主帥梁志榮）、『阿冼』（即助教冼家裕）、『Sealy』（即龍門教練鄭皓文）同『文仔』（即技術總監招重文）幾個識十幾廿年嘅舊隊友一齊工作，係一種福氣，我亦好珍惜呢個工作關係，訓練好，比賽好都係『細榮』嘅工作，我唔會指指點點、說三道四，除非佢需要我出聲或者做啲咩，如果唔係我只會企喺後面，做佢背後嘅男人。開季到依家都係咁，大家做嘢都做得好開心。」
癲得嚟有Heart 球員讚奇人
夢想FC之前聯賽曾敗於傑志腳下，有不願透露姓名的球員（擔心被指扒仔）表示，事後「阿駒」不斷緩和隊內氣氛，實施多項「措施」提高球隊士氣，外人未必清楚，但隊內上下卻深深感受到：「佢有時啲行為好癡線，可以玩到好癲，但其實做咗好多嘢，令大家喺隊波入面可以過得開心，我踢過幾隊波，都未遇過咁嘅管理層，佢真係奇人嚟！」「阿駒」則謂或許有人會覺得，他在球隊「搞咁多嘢為乜？」，但許多措施在英超球會都有，而且起到很大作用，那為甚麼不可以在港超球隊施行呢？常說港超球會英超球會無得比，有沒有嘗試提升自己呢？「奇人」提出的問題，值得反思。
本周賽程
高級組銀牌8強
10月21日（六）
傑志 Vs 標準流浪
將軍澳運動場
下午2時30分
$80、$30（特惠票）
和富大埔 Vs 陽光元朗
旺角大球場
下午5時30分
$80、$30（特惠票）
10月22日（日）
冠忠南區 Vs 理文
將軍澳運動場
下午2時30分
$80、$30（特惠票）
東方龍獅 Vs 香港飛馬
旺角大球場
下午5時30分
$80、$30（特惠票）
圖/文：大頭
（部分相片由受訪者提供）