黃子揚繼承文武雙全
古有孟子阿媽為幫個仔讀好書而「孟母三遷」，估不到曾在70年代叱咤本地足壇、前馬來西亞門神黃金福，20年來亦為「寶貝仔」黃子揚（Oscar）的學業，由香港搬去上海、再回流馬國後，今年決定重返香港，讓Oscar入讀著名學府中文大學！不過，這位「門神二代」亦深得父親遺傳「文武雙全」天分，學踢足球僅5年即有小成，在剛過去的周日更為標準流浪正選上陣，成為球隊躋身高級組銀牌賽8強功臣！
代表馬來西亞參加1972年慕尼黑奧運後，黃金福就來了香港發展，為加山、南華、流浪、精工等多間著名球會把關；而最令人留下印象是在征戰沙場同時，黃金福更在理工讀夜校進修，足見其對追求知識的重視，而這份重視亦投射到兒子Oscar身上：「退役後我本身喺香港搞電機工程，但Oscar讀完幼稚園搵唔到好嘅小學，於是就決定辭工舉家移居上海，報讀到一間名校。直至讀到初中三就回流馬來西亞，都係因揾到好學校。到咗今年，我就同Oscar講，如果香港最出名嗰兩間大學收你，咁就返香港啦！結果中大話收佢，而妹妹就讀港大，咁咪一齊返嚟香港囉！」黃金福強調一直都是以兒子學業為先，踢波只是第二，故今次帶兒子返回其成名地香港球壇，絕對只是巧合！
16歲先知老竇咁威水
黃金福貴為馬國一代經典門將，但原來阿仔16歲時才知道這「秘密」，子揚回憶道：「之前喺上海居住時，只知老竇喺香港做電機工程，但搬到馬來西亞後，發現身邊好多人都識佢，再由佢哋口中先知老竇咁出名！聽得多嘅時候，就開始對踢足球有興趣，於是叫老竇教我踢波！」原來除了「踢得又讀得」外，兩父子擔任守門員也同樣甚具天分。當年黃金福學守龍門5年，就能夠代表馬來西亞出戰奧運；而子揚16歲才學踢波，不足5年就在港超聯上陣！
就是因為足球，令子揚與心目中不苟言笑的「嚴父」之間，多了一道溝通橋樑：「喺上海長大加上又有身高，就想好似姚明咁打籃球。但自從學踢波之後，就好想好似老竇咁勁！亦因為足球，我哋多咗共同話題，感情亦好咗！」然而，子揚亦承認也會出現反叛情緒：「依家有自己諗法就多咗拗撬，有時我係認同佢嘅講法，但我要做到先得嘛，一畀佢鬧就會好忟！不過，如果換轉嗰句係教練鬧就唔會駁嘴，但始終呢個係老竇，覺得唔啱就要拗吓，咁先叫做兩父子嘛！」
做好本分毋須怯場
即使有爭拗，但子揚亦明白父親都是其背後最大支援。今年3月，子揚在迎戰港會一仗首次上陣港超聯，賽前告訴父親自己「怯怯哋」！見慣大場面的黃金福即霸氣地道：「有乜好怯？龍門擺出嚟就要畀人入波，教練認為你得先會畀機會你落場，你做好自己就得啦！」子揚聽過後如釋重負，果然最了解子揚莫過於父親黃金福！
黃子揚小檔案
年齡：22歲 身高：1米88
體重：78公斤
司職：守門員
效力球會：標準流浪
圖、文：司徒子文